Lockyer duhsakna hlantu Eriksen

Euro 2020 tournament khelh laia Denmark tana Finland a hmachhawn tum khelmuala lungphu chawlh (cardiac arrest) vanga tlu Manchester United mid-fielder Christian Eriksen chuan cardiac arrest vang bawka tlu Luton Town captain Tom Lockyer chu a thlawpzia lantirna message a thawn.
Tarlan tawh angin, karliamta Inrinni Premier League game-a Bourne-mouth an luhkhung tumin Lockyer chu khelmualah nikhaw hre loin a tlu a, minute 65-ah inkhel tihtawp nghal niin, kha thil thlen lai khan 1-1-in team pahnih an in-draw mek a, damdawi in lama hruai a nih hnuah pawh khelh chhunzawm loin an chawl hlen ta rih a ni.
June 2021 khan Euro 2020 game a khelh laiin midfielder Eriksen a tlu a, damchhuak lehin Old Trafford club innghahna player pawimawh a ni chho leh mek a, Luton Town captain thlamuan tur leh fuih tura fit berte zinga mi pawh a ni hmel!
BetFred hnenah Dane Eriksen hian Lockyer hnena message a thawn thu hi hrilhin, “Thil thlen dan kha chhiarin ka lo thlir ve bawk a, a thatchhuah leh ngei ka beisei tlat a ni.
“Amah thlawp tlat turin a kiangah a chhungte an awm a, hun erawh a duh hlek mai thei a, an boruak tawn pawh a tha chho zel a; a ma hnena thurawn ka han pek duh chu a theih anga thaa thutlukna siam a ni. Doctor-te thu ngaihchan tur a ni a, i beisei loh lam deuh ti tura an hrilh che a nih pawhin an thurawn chu zah tur a ni,” tiin chutiang chiah hun harsa lo paltlang tawh chuan thurawn a pe.
Welsh centre back Tom Lockyer hi khelmuala nikhaw hre loa a tluk vawihnihna ni tawhin, kumin May thla Luton promotion playoff final-ah pawh khan a lo tlusawp tawh a, lung zai hial a tawh hnuah a playing career a chhunzawm leh thei a, heti a nih nawn leh tak hnu hian khelmualah a kirleh thei dawn em tih chu tun maia chhan theih a ni rih lo!