Lok Sabha-ah gas canister keng mi pahnih lut

December 13 khan Lok Sabha ah mi pahnih chu public gallery atanga zuang thlain gas canister an keng bawk a.
Mi pahnih tena House an luh lai hi Zero Hour lai niin pakhat zawk chuan thutthleng te a zuan khum zuai zuai laiin pakhat public gallery atanga zuang thlain gas substance an kap darh a, chu chuan House chhungah buai nuai nuai a siam zui a ni.
Congress M Adhir Ranjan Chowdhury chuan, mi pahnihte hian tear gas canister an keng a ti a. Parliament beihna champha 21-na chiahah ‘nasa taka security hlawhchhamna a thleng a ni’ tiin a sawi.
Pakhat chu Sagar Sharma niin House a luh theihna pass hi Mysore atanga BJP MP Pratap Simha sponsored a ni a. Mita hmutute chuan gallery-ah midang pahnih pawh an la awm an ti bawk.
BSP MP Danish Ali chuan eng vangin nge heng mi pahnih tena House chhung an luh theih, tih leh tu te nge luh theihna pass pe hriat chian ngei a phut thu a sawi nghal a.
Shiv Sena MP Arvind Saant chuan kimchang zawka sawiin, “MP ten pakhat zawk chu an man thei a, pakhat erawh chuan thutthleng zuan kanin a zuang kual vel a. Chumi hnuah a pheikhawk phelhin cannister chu a la chhuak a ni,” tiin a sawi.
“Zero Hour laia thil thleng hi Lok Sabha chuan a chhui chiang mek a, Delhi Police te pawh chhui zui tura remtihna a pe nghal a ni. A tira kan hlauhthawn meikhu chu zirchianna neih hnuah thil hlauhawm erawh a lo ni lo,” tiin Lok Sabha Speaker Om Birla chuan a sawi.
Congress leader Gaurav Gogoi chuan, “Mi pahnih la thalai tak ten Parliament gallery a canister atanga colour gas rimchhe tak an phuh ka hmu a ni. Heng mite hi MP te chuan man an tum a. Pakhat chuan aupui a nei a. He thil thleng hian new Parliament building a security-ah zawhna a siam a ni,” tiin a sawi.
Congress MP Gurjeet Singh Aujla chuan mi pahnih zinga pakhat zawk chu manin canister a ken pawh a vawm hmain a man sak a. “A kuta a thil ken atangin yellow-coloured smoke a chhuak a. Ka man sak a, pawnah ka vawm chhuak a ni. Hei bak baka security hlawhchham a awm lo,” tiin a sawi.
Dar 2 House thutkhawm a awm leh hnuah hruaitu hrang hrangte chuan an ngaihmawh thu sawiin chung zingah chuan designated terrorist Gurpatwant Singh Pannu-an tun hnaia vauna video a tihchhuah te pawh an sawi a. Mahse, Speaker BIrla chuan House a sawiho chi a ni lo a ti thung.
Speaker Birla chuan House security lapse chu uluk taka chhuia enfiah a ni ang tiin party tin MP te chu an ngaihmawh te sawi turin a ngen bawk.
Birla chuan mi pali man an nih tawh thu sawiin House chhungah pahnih leh house pawnah pahnih he thil thleng kaihhnawiha inhnamhnawihna nei ni ngeia an ngaihte an nih thu a sawi bawk.
Lok Sabha chuan a chhuichiang mek a, Delhi Police te pawh chhuichiang tura tih an ni tawh a ti bawk a. Meikhu an tihchhuah chu a landanah thil hlauhawm a ni lo thung a ti bawk.