Lok Sabha-ah sawi hlawh Waqf Bill pawm ta

Lok Sabha-ah sawi hlawh Waqf Bill pawm ta
Indian dan siamtute chuan bill sawi hlawh tak, kum za tam liam tawh atanga Indian Muslim-ten ram an pek, cheng tluklehdingawn tel hu enkawlna tihdanglamna tur chu rorelna in hniam zawkah an pawm ta.
Darkar 12 chhung zet Lok Sabha-a sawiho a nih hnuah Ningani zing 02:00 vel khan vote lak niin 288-232-in an tlang ta a. Ninganiah rorelna in sang zawkah pharh zui leh a ni ang.
Prime Minister Narendra Modi-a sorkar hian Waqf (Amendment) Bill, 2024 an tih, dan awm sa siam rema tihdanglamna tur eng emaw zat awm hi an pharh a ni.
Sorkar chuan he bill hi pawm a nih chuan hmunhma leh thil dang (property), waqf an tihte enkawl dan chu langtlang zawkin a awm thei dawn niin an sawi.
Eptute leh Muslim pawl hrang hrangin an duh lo va, India-a sakhaw zuitu tlem zawk lian berten dan anga dikna chanvo an neih tihchhiatna niin an sawi.
Bill hi nikum August khan parliament-ah pharh a ni tawh a; mahse, eptuten an duh loh em avangin joint parliamentary committee (JPC)-ah thawn kir leh a ni.
Nilainia Minority Affairs Minister Kiren Rijiju-a’n a pharhnaah eptuten an sawiselna pawh telin a hmaa pharh kha hmun 25-ah tihdanglam a ni tih a sawi.
Rorelna in hniam zawka pawm a nih hnuah Rajya Sabha-ah sawiho leh a ni dawn a, an pawm chuan President Droupadi Murmu-i’n a hming ziah hnanin dan a ni tawh dawn a ni.
Congress MP, Rajya Sabha-a leader of the opposition ni bawk, Mallikarjun Kharge chuan ‘dan lo thil leh Modi-a sorkarin ram then a tumna’ tiin he bill a duh lohzia a sawi a. Muslim-te pawhin bill hi ‘waqf law tihchak lohna tur leh waqf property-te neihsak leh tihchhiat tumna’ tiin an sawi.
Nilainia bill a pharhnaah Rijiju-a chuan eptute hian thu dik lo thehdarhin Muslim-te dikna chanvo chhuhsak tumna angin an chhuah tih a sawi.
“Waqf (Amendment) Bill kan pharhah hian JPC atanga rawtna tam tak telh a ni a, hei hi kan lo pawm tawh leh dana tel atana kan duhte kha an ni hlawm,” a ti.
Eptute erawh chuan JPC hian BJP leh an thawhpuite rawtna chauh an pawm a, mi dangte rawtna chu an hnawl vek niin an sawi ve thung.
Waqf property an tih hian mosques, madrassa (Muslim sakhaw zirna in), shelter home leh Muslim-ten an kohhhran tana an pek ram acre sang tel a huam a, hei hi board-in an enkawl a. Heng hmunte hi tam tak tak chu luah loh niin thenkhat chu miin an chhuhsak ve bawk.
Islam sakhaw danah chuan waqf-te hi miin an sakhaw thila an pek a ni a, hralh emaw, tuten emaw an lo hman a remchang lo va, Pathian ta niin an ngai.
Sorkar chuan waqf board-te hi India-a ram neitu lian ber niin a sawi a. India-ah hian waqf property 8,72,351 awmin acre 9,40,000 chuanga zau a ni a. Rs. vaibelchhe nuaih tel man a ni.
Bill duh lotute chuan heng sakhaw hmunte enkawltu tur sorkar a inrawlh tur an duh loh langsar niin heti a nih chuan property-te pawh ‘waqf’ a ni thei tawh dawn lo niin an ngai.
Bill hian wafq board-ah Muslim ni lo member pahnih an awm a phalsak tawh dawn a. Sawiseltute chuan Muslim ni lote enkawl sakhaw hmunah pawh rin dan hran neite an tel ve ngai lo niin an sawi a, Muslim bik tih chu an duh lo.