Lokayukta-ah Investigation Wing siam turin CYMA-in rawtna thlen

Lokayukta-ah Investigation Wing
siam turin CYMA-in rawtna thlen
Mizoram Lokayukta hnuaia Investigation Wing din turin Central YMA chuan chief minister an ngen.
Central YMA hruaitute hian an president Lalhmachhuana hoin Thawhtanni khan chief minister Lalduhoma an kawm a. YMA Rorel Inkhawm thurel, Mizoram Lokayukta-a Investigation Wing siam chungchang an sawipui. The Mizoram Lokayukta Act 2014 (amendment) a ‘investigation’ tih lai paih tawh, Act-a dah let tura ngenna an thlen bawk.
Chief minister hian lo enzui a tum thu a sawi a. Kumin March 15-a Union Home minister Amit Shah lo zin tuma a tiam pahnih – Thingsulthliaha YMA rama Conference Centre sakna tur cheng vaibelchhe 100 dilna kalzel leh Narcotics Control Bureau kaltlanga ruihhlo dona tur sum dilna thehluh chu lo bawhzui a tum thu a sawi bawk.
Central YMA hruaitute hian ruihhlo ngaite enkawlna atana Jordan Centre Sethawn ami chu cheibawl rawtna an thlen a. Jordan Centre enkawl chungchangah sawrkar leh kohhran an indawr mek tih lo hrilhin, sawrkarin ruihhlo ngaite enkawlna turah ngaihtuahna a sen mek tih a sawi a ni.
Kumin October-a YMA Inkhawmpui Lian neihna tur Sakawrdai leh Mauchar inkar kawng chu chak zawka siamthat hna kal pui a nih tur thu Central YMA hruaitute hi a lo hrilh bawk.