Loneitu ten Delhi panin kawngzawh tan

Loneitu sang rual te chuan Delhi pana kawngzawhna an nei tan a, hun rei tak awh thei turin ration leh diesel te chhek ngah tawkin thla ruk daih an ken thu an sawi a. Mahse, national capital an luh loh nan ramri ah danna siam a ni thung.
Loneitute hian ngiat hrang hrang neiin chung zingah chuan minimum support price (MSP) hman te pawh telin kum 2020 a lungawilohna lantira thla 13 Delhi daifema an inkulhna chu an chhunzawm leh ta a ni.
Loneitute chuan an ngiatte tihhlawhtlinsak an nih hma chuan an lungawilohna an tawpsan dawn loh thu an sawi bawk a.
“Hriau atanga tuboh thlengin, kan trolley ah kan mamawh tur chitin kan keng vek a, lung tihkehna thlengin kan keng a ni. Thla ruk daih ration neiin kan khua kan chhuahsan a, diesel kan mamawh tawk kan nei a ni” tiin Harbhajan Singh, Punjab a loenitute chuan a sawi. A hma in loneitute chuan an tractor leh trolley te an hman theihloh nan diesel leitir an remtih loh thu an lo sawi tawh thung a.
Singh chuan kum 2020 ang lo tak khan kumin chuan an thil ngiat a hlawhtlin hma chuan an nawrna an tawpsan dawn lo a ti bawk a.
“A hma khan tlawm hauh lovin thla 13 kan awm thei a. Kan thil ngiat te tihhlawhtlin min tiam a, mahse, sorkar chuan a thutiam a tihlawhtling lo a ni. Tun tumah hi chuan kan thil ngiatte tihhlawhtlin vek a nih hma chuan kan kalsawn tawh dawn lo” tiin a sawi bawk.
Loneitute hian Chandigarh a sorkar aiawh te nena inbiakna an neih a hlawhchham hnuah zanlaiah Fatehgarh Sahib atangin Delhi panin an chhuak zui a ni.
Union Minister pahnih chu loneitute be tura tirhluh an ni a, Centre chuan loneitute ‘Delhi Chalo’ march chu engtikawng pawha tihpuitlinloh a nih theih nan hma a la nasa hle a, kum 2020 pawh khan Electricity Act 2020 chu a hnukkir hial a, Uttar Pradesh a Lakhimpur Kheri a loneitu nunna chan te zangnadawmna a pe bawk a, farmers’ movement avanga case a siamsak tin te pawh a hnukkir vek bawk.
Mahse loneitute leh sorkar chu thil pathumah an inlungrual thei talt lo va, chung te chu MSP guarantee, loan waiver leh Swaminathan Commission rawtna tihhlawhtlinah te a ni.
Arjun Munda, Minister for State Agriculture and Farmers’ Welfare chuan sorkar chuan loneitute welfare a ngaihsak thu sawiin mahse State thenkhatte rawn ngai an awm a ni a ti thung.
Delhi khawpuia loneitute an luh theih loh nana ramri pinphui vek niin border point pawimawh pathum Ghazipur, Tikri leh Singhu te chu barricade vek a ni a.
Delhi police te chuan kawngpuiah Concrete blocks leh perek te dah niin loneitu te tractor leh trolly te paltlang theihloh tura siam a ni a. Delhi police te chuan Delhi pumah thla khat chhung mipui punkhawm a khap bawk.