Loneitute leh an zirtirtute

Nimina Mizoram Agriculture Service Association (MASA) inkhawmpuilian hmanpuitu agriculture minister Pu PC Vanlalruata chuan, MASA member-te chu kuthnathawktute tana hnathawk an nih avangin kuthnathawktute dinhmun chawikan chu an kuta awm a ni tih pawm theuh turin a chah a; kuthnathawktute tan hamthatna nasa zawk thlen thei turin thawhhona leh inpumkhatna tha nei turin a fuih bawk a.
Education department-in zirlaite a enkawl ang hian, agriculture department pawhin loneitute a enkawl a. Zirlaite hian kum tin kum tawpah exam an nei a, a hlawhtling an awm a, a hlawhchham an awm bawk a; higher secondary school chin hnuai lam exam result-a hlawhtlingte hi a tlangpuiin 70-80% vel a ni thin.
Agriculture department-ina a enkawl loneitute pawh hian kum tin exam an bei ve thin a, kum tawpah result a hriat theih thin. Loneitute kum tin exam result hian, entir nan, 60-70% te hawlh pha ve ta ang se, letter mark emaw, distinction mark emaw, first division mark emaw hmu pha chin hi chu an tam lua lovang tih a rin theih; a chhan pawh, midang thar kep chu sawi loh, mahni chhungkua kum khat tla tharchhuak thei pawh an awm mang tlat lo. State sawrkarin mahni tharchhuah buhfai lei a han tum ve thin tak na a, a ngaihna a la awm meuh lo. Hei hian agriculture department-a thawktute tanlak a ngaihzia a pholang chiang hle awm e.
Sawrkar chuan duhsak takin agriculture department-a thawktute dinhmun a ngaihtuah a, ‘The Mizoram Agriculture Service Rules, 2009 a siam a, an dinhmun chawikan nan an Rules te pawh ennawn a ni thin. Loneitute dinhmun chawikang tura hnathawk kan agriculturist mithiam tak takte hian dinhmun tha tak an neih laiin, hna an thawh chhan loneitute dinhmun hi engtiang takin nge an chawikan ve tih hi inennawn nan hmang ve fo se. Tuna Mizoram loneitute dinhmun hi MASA te siam a ni a, an zirlai loneitute hi an pass-na a sang rih lo hle; state pum tana ei leh bara intodelhna thlentir tur khawpa loneitute dinhmun dawmkan chu sawi loh, loneitute ngei ngeite pawh intodelh an la awm mang lo hi chu MASA-te an tan a pawimawh hle a ni.