Loneitute tan tui pekna tha zawk siamna project enpui

Irrigation & Water Resources secretary Er Lalrothanga chu Inrinni khan Champhaiah IWRD-a pilot project kalpui mek, Modernisation of Command Area Development (MCAD) hnuaia Water User Society member-te nen an inkawm a. He project-in a tum angin loneituten tui hnianghnar zawk an neih theihna tura ruahmanna sawi niin, pump house leh solar plant dahna hmun tur a hmunah an en fel nghal.
MCAD project-in a tum ber chu, canal hmanga thlai tui pek hi a aia tui hman tangkai theih zawkna turin tih dan tha, hmanraw tha leh changkang (pressurized pipe irrigation network) hmanga thlak tum a ni a. Hei hian tui renchem zawk leh tangkai zawkin a hmantir thei anga, thlai thar chhuah a pun phah thei dawn tih sawi a ni.
IWRD secretary chuan he project hlawhtlinna tura a bulpui ber chu loneitute (Water User Society member) an ni, tiin, project zawh a nih hunah pawh an ta anga enkawl chhunzawm zel turin a chah. He project huamchhung tui hna awm ang ang tichhe lo leh tibuai loa hman tangkai dan leh rei tak hman dan inzirtira thehdarh a pawimawh tih a sawi a ni.
MCAD pilot project hi a hlawhtling a nih chuan, a ram pum huapa la kalpui chhoh tur a ni a, hei hian fur laia tui hnianghnar tak, thala tui khamkhawp hmu leh si lo Mizoram tan a tangkai dawn tih sawi a ni bawk.