LPG leh oil dinhmun a tha zel Commercial bur pek dan siam

LPG leh oil dinhmun a tha zel
Commercial bur pek dan siam
Tunlai geo-politics avanga eirawngbawlna (LPG) leh tuialhthei (POL) a harsatna thleng thei lakah Mizoram sawrkar chuan ngawrh takin hma a la zel a. Tun dinhmunah LPG leh tuialhthei hi a thleng tha a, mipui tan chiai-na tur a awm lo tih sawrkar chuan a sawi.
FCS&CA department thuchhuah danin, sawrkar laipui Ministry of Petroleum & Natural Gas (MoPNG) chuan state tinin nikhat atana commercial LPG cylinder an pek chhuah theih zat thupek siamin, Mizoram tan chuan ni khata commercial cylinder pekchhuah theih zat hi bur 60 a ni tih a sawi.
MoPNG chuan commercial LPG cylinder hmangtu sector hrang hrang pek dan tur a duang a. Damdawi in leh zirna inin an nitin mamawh chu zaah za pek theih an ni a. Mah se, damdawi in leh zirna in hian an nitin mamawh zat chu thla khat chhunga an hman dan azira chhut tur niin, hei hi OMC-in data a pek atanga hmuh theih a ni tih a sawi.
‘Hospital pakhatin geo politics buaina awm hma khan thla khat chhungin bur 30 hmang ta se, thlakhat chhungin nitin bur 1 zel hmang ang an ni a. Chuvangin, nitin bur 1 zel pek theih an ni,’ a ti.
Service sector dang – hospitalit y/industrial canteen /catering sector adt. chu thla khat chhunga an hman thin zat atanga zaa 20 nitin pek chhuah theih a ni thung a. Hotel pakhatin thla khat chhungin bur 90 hmang ral ta se, a tlangpuiin nitin a an hman zat chu bur 3 ang a ni tihna a ni a, hemi anga chhut chuan bur 3 atanga zaa 20 chu 0.6 niin, ni khat atan bur 1 ang pek theih an ni.
Commercial cylinder chungchanga harsatna awm chinfel a nih theihnan Directorate of FCS&CA chuan rualkhai takin a semchhuak thin tih a sawi a. Consumer-ten an dil ni vekah an lak theihnan nitina cylinder diltute list chu DCSO-ten directorate-ah chhun dar 12.00 hma in an thehlut tur a ni, tiin, dilna format hi duansa a awm tih a sawi a. Tun dinhmunah nitin bur 60 aia tam pek chhuah theih a ni lo tih a sawi a ni.