LPS Cup-ah player 1240 zet inlan dawn

LPS Cup-ah player 1240 zet inlan dawn
Karliamta Zirtawpni zan khan Chanmari YMA Hall, Aizawlah Malsawmzuala Ralte chuan football petin Aizawl District Football Association (ADFA) buatsaih khua leh veng football inelna Mahindra XUV300 LPS Cup Inter Village Football Tournament 2024 a pet hawng a; tournament hawngtu hian player 1240 vel chettlatna tur a nih avangin Mizorama football club thate mai bakah state dang atang pawhin player tha zawnna’n an rawn hman ngei a rin thu a sawi, Mizo thalai theihna nei la inphochhuak lote inlanna remchang buatsaihtu ADFA chungah lawmthu a sawi nghal.
Sawmzuala chuan, “Mizo thalaite zingah football hmanga ei hmu an tam tawh hle a, tun tournament-ah hian an theihna la hmuhchhuah lote an inphochhuak dawn a, an thiamna leh theihna nasa taka an lantir dawn avangin league sang zawkah an lut zui ngei ngei dawn a ni,” a ti.
District dang atanga sawm bik pali nen Aizawl pawn atangin team 21 leh Aizawl chhung atangin 41, a vaiin team 62 an inel dawn a ni.
ADFA Adviser Lalbiakthanga Khiangte, IPS chuan fixture a tlangzarh a; February ni 20-ah 1st Bn MAP Ground, Armed Vengah tournament hi tan a ni dawn a; inkhel hmasa berah mualneitu Armed Vengin trophy humhim turin bul an tan dawn a, zing dar 10 atangin Nursery nen an inkhel ang. Ni hmasa berah hian tournament hnuhnung ber kum 2019-a final lut Republic Veng leh Bungkawn an inkhel dawn bawk a ni.
Ramhlun Sports Complex-ah February ni 22 atangin an khel tan ve thung ang a; vawi thum champion tawh leh team hlawhtling ber Ramhlun South-in February ni 27-ah Zonuam bitumin tournament bul an tan ve bawk ang.
Ramhlunah tho kum 2016 champion Bethlehem Vengthlangin February ni 24-ah Samlukhai an khelpui ang a, a hma niah 2017 Chhinga Veng leh Melthum an inhmachhawn dawn bawk a ni.
Round khatna atanga round of 32 thleng Armed Vengah leh Ramhlun Sports Complex-ah khelh a ni dawn a; round of 16 atanga final thlengin Rajiv Gandhi Stadium, Mualpuiah chhunzawmin, quarter-final atanga final thlenga an inkhelh chhoh dan tur chu pawh that leh a ni ang.
ADFA chuan tournament pet hawnna inkhawmah hian infiamna hrang hranga Mizo thalaite tan hma a lak tawhna ropui an tih thu sawiin, LPS Director Lalsawmliana Pachuau hnenah chawimawina thuziak an hlan a ni.
Inrinniah Lammualah referee turte dinhmun endikin fitness test neih a ni a, Referee Board Chairman HF Lalrinpuia chuan dik taka thutlukna siam turin an infuih nasa hle tih a sawi.
Mizoram football-in kawng tinrengah awmze neia hma a sawn theihna’n, buaina chhuak thin leh referee chunga tharum thawhna thleng thin pumpelh a tul tak zet a, tun tournament-ah hian rahbi thar kai tumin thuneitu lamte’n theihtawp an chhuah.
Rintea chuan, “Khua leh veng inelnaah hian mipui leh player-te kan tang thin a, a lawmawm hle a ni. Chutih rualin, referee-te chungah tharum thawh duh mai tawk kan awm thin a, football referee nih miin an chak loh phah.
“Referee-te’n inkhel an enkawlna kawngah an tha tichak a, dik leh huaisen taka thutlukna an siam theihna’n anmahni tanpui turin team official leh player-te bakah mipui ka sawm duh a ni,” a
Kum 2013 atanga 2019 thlengin ADFA chuan hlawhtling takin kum tin veng leh khaw hrang hrang football inelna a buatsaih tawh a, kum nga hnuah LPS Vision nen thawkdunin tharthawh leh a ni dawn.