LPS Youth Icon Top 10 bihchianna
– Sangtea
Mizorama reality TV show hriat hlawh tak Youth Icon boruak a sang chho zel a, October ni 7-a intihsiakna sang hmachhawn leh turin mi 10 thlan chhuahte ngawrh takin an in buatsaih mek.
September ni 25 atanga ni 27 chhung khan 3rd round neih a ni a, intihsiak hmachhawntu mi 50 atangin a tha zual mi 10 thlan chhuah leh an ni. Top 10-a in hlangkai zingah hian hmeichhia pakhat chauh awmin, a bak chu mipa vek an ni a. Mi 10 zinga pakhat chu Aizawl mi a ni a, a bak mi 9 te chu Aizawl pawn lam mi vek an ni.
Lalremsiami –
Zai thiam thlanna Praise On leh Mizo Idol -ah te lo tel tawh thin mahse a thleng sar lua thin lo. Tun tum Youth Icon zet zawng a tana hun ruat a nih mahna endiktute hmaa intihsiak a hmachhawn tawh chinah a chhe chhe ngai lo. Darlawn Venghlun nula Remremi hian Top 50-ah khan Mizo lengzem hla lar ‘Lungrun’ tih hla a sa a, a sa nalh hle a; Judge te lungdumin top 10 zingah a hming a chuang ta. Sunday School-ah chawhnu inkhawm te, inkhawmpui ah te a zai thin a, KTP member a nih hnuah a zai nasa ta zel a, YMA programe ah te pawh zaia sawm hlawh pawl a ni. Top 10 zinga hmeichhe awm chhun hi intihsiak a hmachhawn hun tur nghakhlel an tamin a rinawm.
J. Lalrosanga –
Fuhchiangtea tia mi thenkhatin a hming an phuah sak hial Tuidam tlangval Rs-a hi LBS Suzuki Youth Icon 2024 boruak ti lian tute zinga ami a ni a, second round-ah ‘Fuh chiang lo maw’ tih hla a hit pui hle a, top 50 round-ah ‘Vala lu a hai’ tih hla rawn vawrh lehin, boruak a neih len belh phah hle. Ram mipuiin an thlir rawn mek Rs-a hi rimawi khawvelah a mikhual lo a, kum 12 mi a nih atangin a zai chho tan a, Salvation Army Corps-ah YP Idol an thlan tumah pakhatna a lo ni tawh a, Mizo Zaimi inzawmkhawm (MZI), Headquarters, Mamit in 2023-a zai intihsiakna Khawtlang Lelte thlanna an neihah top 10-ah a lo in hlang kai tawh a ni. Zai chang a thiam lo, lu met thiam a ni a, eizawn nan a hmang mek a ni.
Samson Lalhunruata –
Second Round-ah H.O.M hla DNChL a sa a, a thlawh fuh teh e. Top 50 round-ah rimawi hmanraw kimchang zawk nen ‘Thahniangi’ tih a sa leh a, a zaithiam zia Mizo mipui min hriat belh tir a ni ber. Senior department zirlai a nih laiin an kohhranah zai intihsiakna a awm a, chuta chuan telin a zai chho ta zel a, KTP branch chetvelna bakah Bial KTP Conference ah te pawh branch aiawhin a zai chho ta zel. Champhai Kanan Veng tlangval hian Second Round-a a zai tum khan a zam hle tih a sawi a, mahse tunah chuan a confi chho tawh viau a, intihsiakna sang hmachhawn a chak tawh.
Ramengmawia –
Mipa aw tham mawi tak nei Mawimawia hian Second round-ah zai thiam fam ta Joseph Zaihmingthanga hla sak thin ‘Kan hlim laini’ tih chu tingtang perh chungin a sa a, ngaihthlak nawn a hlawh ta reng a. Top 50 round-ah rimawi hmanraw famkim zawk nen ‘Don’t let me down’ a rawn thlawh leh zet phei chu result a chhuah hma pawhin top 10-ah a tlin ring an thahnem hle tih social media atangin a hriat. Kum 14 mi a nih atangin hla a phuah tan a, hla 34 vel a phuah tawh. Zai intihsiaknaah a vawi hnih telna a ni a, Mizo Idol-ah a tel a, Youth Icon ah a hming pe lut letin top 10 ah a in hlang kai ta a ni. Rimawi hi a tui chilhna rei viau tawh mahse mipui hmaa han zai tak erawh 2020 vel atang khan a tan chauh thung.
Lalsangliana –
Bawktlang tlangval Taitea tia an koh hi kum 15 mi a nih atangin mipui hmaah a zai chho tan a, KTP inkhawm, YMA in programme an neihah te zai tura sawm hlawh pawl tak a ni a. Zai intihsiaknaah a lo tel fo tawh thin a, tun hi zai intihsiaknaa tel a tawpna tura a chhal a ni a, beiseina sang tak nen Bawktlang atangin Aizawl a pan a, a pan fuh teh e, a tha zual 10 thlan chhuah zingah a tel ta a ni.
Laldinhlua –
Fa pathum nei tawh chhangchhe pa a ni a, a thian tha te nawrna avangin rilru inkhap buai tak chungin LBS Suzuki Youth Icon 2024 elemination round-ah a zai video a theh lut a, a huphurh ruk teh nen a thleng sang ta phian. Zaithiam chuai thei lo C. Vangsanga aw nen khaikhin a ni a, ‘C. Vansanga junior’ tia a hming lo phuah tawkte pawh an awm a. Second round-ah Valzotea hla phuah ‘Lelte nunnem’ tih a sa a, Judge ten kut an ben hnan a, top 50 round ah mai a in lan lo, top 10 round ah pawh a hmel kan hmu dawn. Praise On leh Mizo Idol ah a lo in lan tawh a, a thleng sang hran lo. Tunah hian Champhai Kanan Vengah an cheng mek a, chhungkaw pa a nih angin a tul tul a hnawk a, in sak naah te a in hlawh thin.
Peter Lalnunpuia –
Mizo Idol-ah top 10 pawh lo in hlang kai tawh, rimawi khawvela mikhual lo tak Peter-a hi kumin Youth Icon-ah boruak nei lian ber te zinga mi a ni a. Second round-ah sap hla lehlin ‘Isua chuah’ tih a sa a, tih tak zeta Pathian fakna chawimawia a zai chuan Judge te a hneh hle tih comment an pek atangin a hriat theih. Salvation Army member a ni a, Junior department atangin a zai tan a. A thiante nen Band te dinin vocalist niin, intihsiak an lo hmachhawn fo tawh thin a. Nupui fanau neia in hrang chang tawh a ni chungin Pathian faka zai theihna hun tha a nei leh thei hi lawmawm a ti a, top 50 round intihsiak a hmachhawn dawn nilengin a in serh hrang a, Pathianin thil ropui a hmuh tir tur thlirin intihsiakna ah hian a zai tih a sawi.
Zothankima –
Top 10 zingah a naupang fal deuh a, chuti chung chuan intihsiaknaah erawh a naupanna ngainep chi rual a ni lo ang Tachhip tlangval Kimkima hi!. Kum 9 mi a nih atangin mipui hmaah a zai tan a, sunday School leh School-ah te a zai fo thin. Top 50 round-ah T Melody hla lar ‘Thinlung thawnthu’ a sa a, a aw a danglam a, he hla hi a sawi mawi bawk a niang youtube lamah pawh sawi zui a hlawh tlat.
Zion Tlaichhun –
Hnahlan khaw tlangval mahni hla phuah nen ngata Top 50 round hmachhawntu Zion Lawmnasanga hi mi thenkhat chuan ‘Mizo Ed Sheeran’ tiin a hming an phuah fiam hial. Rimawi hi a tui chilh hma a, kum 14 mi a nih atangin tingtang te perh chho in, a thiante nen Band te an din a, an lo zai ve fo tawh thin. Vawk 10 chuang vulha buai taka hun a hman karah a hmangaih rimawi chu a kalsan thei lo. Zaithiam thlannaah te pawh a lo tel ve fo tawh a, Chhaktiang Lelte ah te pawh top 20 a lo thleng tawh a, mahse a zin kawng a tawi leh thin. Youth Icon top 10 zinga beiseiawm, intihsiakna sang zawk pawh hmachhawn zel tura ngaih a ni a, a hla phuah a rawn sa leh angem tih erawh lo in rin siak mai chi a ni rih.
Lalbiakkima –
Thentlang tlangval Bk-a hi Leikapui Huang ah chuan top 10 zingah a tha ber zinga mi a ni mai awm e tih theih a ni. Second round-ah Lallianmawia Pachuau hla lar ‘Nghilh bik suh aw rinpui’ tih hla a sa a, a thiam ngang mai. Rimawi hi a tui chilh hle a, Synod Music School ah te pawh a lo zir tawh thin. Zai mi a ni a, rimawi a tui em em rualin eizawnna kawngah thawh hreh a nei lo, puan thui a thiam a, chung bakah a tul dan a zirin a in hlawh fa lawp lawp hreh lo.