LS MP-in Mizorama an hna chak zawka thawk turin BRO hotu ngen

LS MP-in Mizorama an hna chak
zawka thawk turin BRO hotu ngen
Lok Sabha MP Richard Vanlalhmangaiha chuan Border Road Organisation (BRO) Headquarter Delhi-ah an director general Lt. Gen. Raghu Srinivasan a kawm.
MP hian Mizorama BRO enkawl kawngpui leh hmasawnna hrang hrang an thawh mek chu chak lehzuala hma la turin a ngen a. PUSHPAK Project hnuaia RCC lei dawh mek chawlh lailawk chu chhunzawm thuai a nih theihnan hma la turin a ngen a ni.
District pathum – Lawngtlai, Siaha leh Champhai district-a land acquisition la pek loh chu a hmalama pekfel a nih theihnan hma la turin BRO DG hi Richard Vanlalhmangaiha hian a ngen a. Siaha district Tipa- Laki- Lope- Lopu (LTTT Road) kawng laih meka additionnal compensation cheng vaibelchhe 82 la tang chu tifel thuai turin a ngen bawk.
BRO hotu Lt. Gen. Raghu Srinivasan chuan Mizorama an hna thawh mek leh thawh tur pawh a tha thei ang leh rang taka thawh a nih theihnan a hma lak a nih tur thu MP hi alo hrilh a. Land acquisition leh compensation la pek loh pawh an ngaihtuah nghal tur thu a lo hrilh. Mizorama an hnathawh a hmun ngeia en a la tum thu a sawi a ni.