Lu-na nei thin tan ei leh in fimkhur a ngai

Lu-na nei thin tan ei leh in fimkhur a ngai
Luna satliah emaw luna benvawn (migraine) i nei thin em? Luna hi mitam takin kan buaipui a, lu natna chhan chi hrang hrang a awm thei a- sinusitis, stress leh rilru hah vang te pawh a ni thei a, chutih rualin kan ei leh in vang pawh a ni thei tih erawh hria kan tlem hle ang. Times of India health section-a ei leh in leh luna in kaihhnawih dan an sawi te kan rawn tarlang e.
Luna kan tih chu lu-a tur deuh ut ut awm ang maia nuam lo awm thin hi a ni a, migraine chu luna-ah rau rau a common pawl a ni a, lu pangkhing lamah a na ngut ngut thin. Dietician Dr Sunita Dube chuan, “Migraine lan chhuah thinna chhan zinga 30% chu kan ei leh in vang a ni,” a ti.
Nutritionist Niti Desai chuan ei leh in thlak thut te, nasa deuh taka in-diet thut te hian lu a tina thei niin a sawi a, “Kan ei leh ina carbohydrate te kan paih vek chuan lu a ti na thei. Kan thluak hian carbohydrate lo chu fuel atan a hmang thei lo. Blood sugar level a hniam hian lu a na thei bawk. Chaw ei huna ei loh mai mai chin te, riltam taka awm fo te hian luna a thlen thei a, tui in tlem lutuk pawhin luna a thlen thei,” a ti.
Tyramine hi lu tina tu common ber pakhat a ni. Tyramine chu amino acid a ni a, kan thluaka hlimna siamtu hormone, serotonin a titlem thei a, thisen zamah nghawng neiin luna a thlen thei ta thin a ni.
Tyramine chu kan ei leh in thin chi hrang hrangah a awm a, chung zingah chuan red wine, cheese, chocolate, zu telna chi in tur, coffee leh sa tin-ah te a tam zual.
Dr Dube chuan mithenkhat chu zu lam chi reng reng an ina luna (migraine) chhuak thin an awm niin a sawi a, red wine mai bakah beer leh whiskey te pawh serotonin level a tihniam thei a, chu chuan migraine a tichhuak thei niin a sawi.
Chocolate-ah pawh tyramine a awm a, hmeichhia ten stress leh hormonal change an neih laiin chocolate an chak zual thin a, chu chuan an luna pawh a tizual thei niin an sawi.
Coffee in thangin a nghei thut hian a lu a nat phah thei. Clinical nutritionist Dr Nupur Krishnan chuan, “Coffee hi addict ve theih deuh a ni a, mi a tiharh vangin concentration lamah pawh mi a tichak thei. Mahse, caffeine a pai a, chu chu migraine nei thenkhat chuan lunat phah nan an hmang thei. Chubakah coffee inthinin a nghei thut hian a lu a nat phah hlauh thei bawk,” a ti.