Lukaku club thar Napoli

Belgium striker Romelu Lukaku chuan Chelsea chhuahsanin Serie A club Napoli a zawm fel a, a manah Naples khaw team hian west London club hnenah pound maktaduai 30 an hlan.
Kum 31-a upa ni ve tawh Lukaku hian kum 2011 leh 2014 inkar chhung khan Chelsea tan a khel phawt a, hmun danga a chhuahbo hnuah May 2022 khan Stamford Bridge a pan leh a, chu ta tangin Italy-ah a kirleh ta a ni.
Napoli manager Antonio Conte hnuaiah kum 2019 atanga 2021 thleng khan Lukaku hian Inter Milan tan a khel a, Italian top flight-a a season lo hman tawh pahnihah khan a chetha takzet a, chu chu tuna Conte nen an thawhdun leh chhan tur pawh hi a nih ngei a rinawm.
Tarlan tawh angin, Chelsea chuan he mihang striker hi kum 2021 khan pound maktaduai 97.5 tehrengin an hruaikir leh a, mahse, season hnih liamta chhung khan chhawr mumal loin Italy lamah loan-in an kaltir a, a hmasa zawkah a club hlui Inter-in an chhawr phawt a, a hnuah AS Roma lamin an kawl ve leh a, tunah chuan a nghetin Napoli-in an ruai dawn ta a ni.
Kum 2021 khan Conte hnuaiah Lukaku hian Serie A league goal 24 zet thun tlingin, khati taka a chetthat avang khan a club hlui Chelsea pawhin an ngam huai ta reng niin a lang.
May 2022 hnu lama Chelsea tana khel ngai tawh lo Belgian hi Stamford Bridge club tan sumthuninu pakhat a tling ve dawn a, chawlhkar tin £325,000 pek ziah ngai a nih avangin tuna an thehthang thei ta hi an sumbawm chuan a thatpui ngei rin a ni!
Lukaku chhuah rual hian Chelsea midfielder Tino Anjorin pawhin kum thum chhung atan Serie A club dang Empoli a zawm ve bawk.
Mithar sengluh mamawh Chelsea hian kum 25 mi Nigeria striker Victor Osimhen an dawr mek a, mahse, sum ngah Saudi Pro League club Al-Ahli pawhin African chan tumin Napoli an dawr ve mek a, tunge chang zawk dawn hriat theih a la ni rih lo.
Tunhnaia pre-match news conference a hmachhawn tumin Conte hian zanim game-a Parma an hmachhawn hunah Lukaku hian a Napoli debut a nghakchhuak thei mai thei niin a sawi.