Luman Rs. nuai 25 nei Maoist hel that

t, Chhattisgarh-ah Thawhlehni khan venhim hna thawktuten Maoist pathum an that a, an zinga pakhat hi a luman Rs nuai nei a ni tih police-in an sawi.
Inbeihna hi Dantewada leh Bijapur district inrinaa ramngawa zing dar 08:00 vela thleng niin venhim hna thawktuten Maoist laka beihpui an thlaknaah a nih thu Superintendent of Police Gaurav Rai chuan a sawi.
State police hnuaia District Reserve Guard (DRG) leh Bastar Fighters-ten beihpui hi thlakin Girsapara, Nelgoda, Bodga leh Ikeli khaw chhehvel ramngawah Maoist an awm tih thu an dawn an bawhzui a ni tih a sawi.
Inkahna a tawp hnuah Maoist mipa pathum ruang an hmu a. Insas rifle, 303 rifle, puak thei leh ni tin mamawh thilte an hmu bawk.
Maoist thah pathum zinga pakhat hi Sudhakar tih leh Murli ti pawha an sawi thin, Warangal, Telangana-a cheng, Sudhir-a a ni tih an hre zui a. Ani hi Maoist-a pawl chak ber pakhat, Dandakaranya Special Zonal Committee-a an member a ni tih Rai-a chuan a sawi.
A luman pawh Rs nuai 25 an chhiar lai a ni a. A thiante pahnih erawh tute nge an nih hriat a la ni lo thung a. An thian dangte zawn hna pawh thawh chhunzawm nghal a ni.
Union Home Minister Amit Shah chuan tun hnai khan Narendra Modi-a sorkar chuan Maoist-te lakah beihpui na zawkin a thlak zel dawn a, inpe ve duh lote lakah chuan ngaihhnathiamna awm lovin thapui an thawh dawn tih a sawi.
Shah hian India chu March 31, 2026-ah chuan Maoist awm lohna a ni tawh dawn tih a sawi bawk.
March 20 khan venhim hna thawktute chuan Bijapur leh Kanker district-a beihpui an thlakna hmun hnihah Maoist 30 an lo thah tawh bawk.
Sorkarin a chhinchhiah hnuhnung berah chuan kuminah Chhatisgarh-ah hian Maoist 116 kah hlum an ni tawh a. An zinga 100 hi Bastar division an tih, Bijapur leh Dantewada tela district pasarih huam chhunga thah an ni.