LUNG PHUM LEH HAWN LEH MINISTER BAG KHAITU TIH KHA

H. Lalchhuanliana

Tun hma atanga kalphunga kan neih kan la chhunzawm reng chu sawrkar hmalakna tura lungphum, building, kawng leh thil dangte kan Minister-te phumtir leh hawntir hi a ni. Hetiang hi MLA inthlan dawn hnaihah a hluar ziah thin a, Minister meuh han phum leh hawn atana inhmeh lem lo takte pawh a awm nual thin a ni. Hun hmasa lamah tawh khan fiamthu awmze nei tak pakhat a awm a, kan Minister-te hian thil hawn tur hi an duh khawp a, inkawibah pawh hi hawng turin sawm ila an hawng duh tho ang, tih thu kha a lar hle a nih kha! Minister-te hian in sak etc. hi an hawng tur a ni lo tihna lam ni lovin, an hawn awm chin erawh an thliar thiam a pawimawh hle tih hi ka sawi tum chu a ni. Dik taka sawi chuan department hotute hawn awm tak takte Minister-in an hawn hi a lo awm nual tawh thin a. Politician-te hian an lansarhna tur platform hi chu an mamawh a ni thei e, mahse lung phum leh building an hawn tam tak hi chu an office kalsan nan meuh atana tenau deuh hi awmin a lang thin. Mi hriat an hlawhna tur Platform tha ber chu an hnathawhah hian ni zel se, mipuiin chu chu kan tehfung pawh ni thin teh se.
MINISTER BAG KHAITU Minisrty hmasa lamah khan Assembly Sessionah Minister pakhatin anmahni vengtu Police, Personal Security Officer(PSO) te chu kan bag khaitute tiin a rawn sawi ri zauh mai a. He thu hi Police Officers group pakhatah an khel nasain an naute Minister bag khaitu ang leka an chhuah chu an enghelh hle a ni. Minister-in kan bag khaitute tia PSO te a chhuah mai atang hian an bag an lo khaitir fo thin tih a chiang hle a, a zia lo hle mai. PSO duty chu an mi vente himna tura thawh a, a tul chuan anmahni nunna chan thlenga inpek a ni a, bag khai tur an ni lo. PSO te chuan tlawmngaih thilah an pute bag khaisak an tum a nih pawhin an pute hian an duty a ni lo tih hriain lo remti lo se, an himna dal thei tur awm engmah insiam loh tur a ni ang. Ram ralmuang kan nih avanga dan hi palzut a nih chuan Kalphung hluiah kan hruaitu tharte hi an la cheng tihna a ni ang a, thil dangah pawh harsatna an tawk thei mai ang. Kan Minister leh MLA te hian Bag rit deuh khai tur an nei a nih pawhin house orderly an nei a, office an thlen hunah pawh peon-te an lo awm tho a ni. Mi tin hian kan duty theuh kan tih hian dan kan zawm tha a ni mai, chu chu Kalphung thar kan nghahhlelh zing ami kha a ni e. Prime Minister leh VIP dang PSO ten an pute bag an khaisak lai hmuh tur a awm ngai lo. An duty-ah an chianga, englai pawha inring reng leh zahawm tak, an vente himna kha an hna ber tih hriat tak leh zuamawm loh takin an awm reng thin a ni.Kan CM hi venhimna lama tawn hriat nei leh PSO hna hre chiang berte zing ami a ni ang a, a Minister leh MLA rualte hi thil kalhmang a hrilh chuan Kalphung thar dang an siam belh a ni mai .
Kalphung thar sawrkarah hian thil hote anga lang thlenga ennawn ngai hi a awm nual ang tih hi a rinawm. Nikum inthlan hmaa mipui au aw leh chanchinbu leh social media hrang hrang atang khan a chiang awm e. Kha sawrkar lai duh khawp lohna leh an thil tih dik lo ni a mipuiin an hriat, eirukna hluar, party bil induhsakna, SEDP pawisa party membership zawnnana hman, hnathawh tha tawk lo, kawngpui chhe lutuk,contractor mi tlemte uchuak taka duhsak bik neih(hnam dang thlengin) hnamdang smuggler case nei lai leh kan ram hruaitute inzawma sawinate, ram hruaitu hausa chak lutukte (thluaka sum lut) dan kenkawh dul lutukte leh an thutiama an din loh thute kha kan Sakhaw Puithiamte thleng khan an tlangaupui a nih kha. Kha mipui au aw khan awmzia nasa tak neiin Sawrkar thar a piang ta nawlh a nih hi. Thil dik lo tê tak tê hian dik lo lian zawk a hrin theih tlat avangin dikna nena ram rorelna hi kalpui tur a ni a, dikna hi hnehna a ni tih kha vawn reng tur a ni. He thu ka ziah lai mek hian kan Supply etc Minister Pu Lalchhanzova’n Mamit khuaa a thusawi ka ngaithla a, thil hote a ngaih thlenga ennawn ngai a awm thu hi a rawn tichiang hle niin a lang. Sawrkarah Minister niin hna an han thawk tana, chuta a thil hmuh, siam that ngai tam ziate, dan lo hi dan emaw ti ang maia thil kal a lo tam avanga Minister ho an luhai thu te a ni. Siam that ngai a tam vanga hmasawnna duh anga a kal chak lo a nih pawha lo hrethiam hram hram turin mipuite a ngen hial a nih kha.
A theih chin china VIP culture tihbo duhtuten sawrkarna an chang ta bawk a, an bul tan dan pawhin mit a tlung viau rih a. Rorelna thutthlenga an han thut hian rilru dang pu mai lo se, thil dik si lo leh rei tak dik anga lo neih tawh a awm pawhin dik leh tha zawkin han thlak zel teh se. An inzawrhna ber Kalphung thar, rorelna dik leh tha zawk lantir hi mipui beisei a nih kha. Official fel tak tak, tu te hunah pawh thuthmun sawn hlei thei loten kan hruaitu tharte hi an lo thawhpui mek che u a, office kalphung pawh in zir ngun a tul hle ang. A tul phawt chuan staff siksawi pawh hi hreh tur a ni lo, mahse politics thil vanga transfer erawh a tha ber lo fo. Sawrkar hnathawk awmna ngaia awm rei lutukte hian an thawhpui dangte harsatna an siam a ni tih erawh chu hriat tur a ni. Tun hma lam khan office pawisa khawihtute, (Cashier) phei chu hmun khata an awm hun bituk sak an ni a, rei tak awm loh tur tih a ni. Sawrkar hnathawk tan hian khawi lai mah hi awm hrehna leh awm duhna bik neih hi a thiang lova, awm duhna bik neia thuneitute zar sek thinte hi anmahni tana hlawkna zawng an ni fo thin.
|hahnemngaih thilah ka han peng ta hret a, ram rorel hna hi thil awlsam a ni lo tih hi kan hriat theuh a ni a. Nimahsela dikna leh rinawmna nena mipui dah hmasa ber chunga thawk tak taktute chu malsawmnain a zui ngei ang tih i ring ngam ang u. Thuneihna thutthleng hian chapona a keng tel duh tih hi ram hruaitute hian englai pawhin hria se, Chapona hi Pathian huat zawng tak a nih bawk kha. Kalphung thara kal tur chuan danglamna a awm ngei ngei a ngai a, thil ho tea ngaih atang a bul tan hi a pawimawh tih hriat reng a tul awm e. Tun hmaa thil tih dik lo awmte pawh a theih chin chinah siam dik zel ni se, phuba la zawnga hmalak erawh tih loh theih a tha ang. Dan bawhchhiatna leh action lak ngei ngai chi a awm erawh chuan danin a kawng a zawh mai tur a ni thung ang.
Kalphung thar sawrkar hi danglamna thlen turin han tang zel teh u le.