SEM SEM DAM DAM, EI BIL THI THI

Zion Lalremruata,
Former General Secretary,
AMFU Gen. Hqrs.

Tun Budget Session liam taah khan kan hriat angin State University Lungleia dahna tûr Bill chu pass a ni a; he Bill MLA rualten an sawi ho laite pawh a ngaihven tan chuan a la mitthla vek theih awm e. Tin, he Bill denchhena Pu Lalmuanpuia Punte, Adviser to CM thusawi, “Aizawlah chauh thil thar dah tawh loh tûr,….”, tih chuan Social Media a luah hneh hle mai a. Ka hmuh phâk chinah mi tam zâwkin Pu Muanpuia thusawi hi âwm an tihpui laiin mi thenkhat chuan an sawisel bawk a ni. A ni lah taka, Mizoram hi chîk taka han thlir vang vang chuan Aizawlah hian thil engkim mai hi a awm ti ila kan sawi sual tam âwm love; hei hian hmasawnna rualkhai lo leh harsatna tam tak a thlen a ni.
STATE UNIVERSITY Bill hian tuna Thenzawl khuaa awm ta Horticulture College saw min ngaihtuah chhuah tîr a. Pu Sharad Pawara, Hon’ble Minister, GoI khan Mizoram a lo tlawh tum khân kan State Sawrkar khan duhsak takin AMFU hruaitute kha kawmna hun Dt 29th, April, 2011-ah min siamsak hlauh mai a. India rama Minister leh Politician zînga a palian pawl tak kan kawm tur kha kan lawmin kan phur tlâng hle mai a; tin, he a lo zin hriatreng nan hian Horticulture College lo dil ni se tih kan President Pu R.Lalduhawma (L), Kolasib ho khan kan rel a. Pathian zarah kan duh dan anga thil kalin kan dil Horticulture College chu min pek tur thu Pu Sharad Pawar khan a sawi a, kut pawh kan beng ring tlang hlawm hle (Hon’ble Agriculture Minister, GoI hi khatih laia Hon’ble Minister of Agriculture, GoM, Pu Liansailova chuan a tawiawm a ni). Khang hun laia Parliamentary Secretary pakhat phei chuan, “Chân loh khânah thang a per”, a ti nghe nghe. A nihna takah chuan department pakhat phei kha chu an lawm vak lo nghe nghe mahse, keini lam pawh khan ngaihtuahna fîm tak hmanga thil ti kan ni a; kan inchhîr lo.
Tichuan, Horticulture College dahna hmun atan hian rem leh rem lovin Aizawl lamah dah tumna a awm tih kan hria a, kan ngaihtuah zui vat a; Mizoram a District hrang hranga palai kal khawmten beng sika kan ngaihtuah in hmun laili tha leh pan awlsam, zo leh phai thlai chin theihna hmun Thenzawl chu lungrual takin kan thlang ta a ni. Kan hmalakna beitham takte kha an hre ve ni ngei tûr a ni Horticulture College enkawltu Director of Administration chuan tum hnih ngawt Thenzawlah hian min sâwm angin ka va tawiawm nghe nge nghe. Kan hmalakna hrang hrangah hian khatih laia Chief Minister Pu Lal Thanhawla kha a patlingin a fakawm tak zet a ni.
Tûn hnûa thil kal tawh ka ngaihtuah hian he College Thenzawla dah duh lotu ten an sawi hrang hrang heng communication, health facilities, educational institutions etc. te kha chu chhuanlam tling a lo ni hran lo. Tunah phei chuan khang hun lai ai khan heng a chunga kan tarlanhoah hian hma kan sâwn viau tawh a ni.
India ram State zîngah pawh a te pawl tak Mizorama thil engkim deuh thaw kan State Capital-a dah kan tum ngawt zêl hi chu a tul ber lo khawp mai, District Hqrs hrang hrangahte hian a remchan dan leh tûl angin dah thîn ila hma kan sâwnpui zâwk ngei ang. Kan Pi leh Puten “Sem Sem dam dam, ei bil thi thi” an lo tih thin angin hmasawnna thil hrang hrangte hi a dahna âwm Mizorama District Headquarters hrang hrangah te hian sem zai thiam ila, mipui kan hlim tlang ngei ang. Chhungkaw zînga Fa U berin huamhauh taka thil tha zawng zawng neih vek a tum chuan nauteho an lungawi thei dawn lo; chuvângin, rilru zau tak pua kan dam tlanna kan thlîr thiam a pawimawh ber fo dawn a ni.