Lung tana chaw\ha, potassium pai tam

Potassium pai tam chaw hi lung (heart) hriselna atan a pawimawh hle a, mithiam ten zirchianna an neih atangin potassium pai tam chaw ei tam hian lung lam natna chi hrang hrang risk a thniam thei niin an sawi a, Denmark-a mithiam ten zirchianna an neih tharah phei chuan potassium pai tam chaw ei tam hian heart failure risk te pawh a tihniam thei.
Potassium chu kan taksa atanga sodium chuangtlai paichhuahna kawnga fluid level siamna kawnga puitu, lungphu mumal tak kan neih theih nana pawimawh leh blood pressure control-tu mineral pawimawh tak a ni. Kan ei leh inah hian sodium a tam a, potassium kan la lut tlem ve leh thung a, chutiang chu mi nawlpui te ei leh in dan a ni. Potassium hi kan BP leh lung that nan kan mamawh si a, chuvangin potassium tamna chaw kan ei tam a pawimawh hle a ni. Tun tumah hian potassium tamna chaw ni a Times of India-in a tarlan te kan rawn chhuah chhawng e.
1. Avocado: Avocado hian potassium a pai tam hle a, avocado pum pangngai phel-ah hian potassium 360 mg vel awm angin an chhut a, chu chu kan taksa atanga sodium chuangtlai paih chhuak a, BP tha zawk kan neih theih nana thil tha tak a ni. Avocado-ah hian mawm hrisel chi leh fiber a tam bawk. Avocado chu tukthuan leh chawchhun velah ei fo thei ila a tha hle a ni.
2. Balhla: Balhla pum a lendan laihawl velah hian potassium 330mg vel awm angin an chhut a, balhla hi lung tana chaw tha zingah chhiar tel a ni reng a ni. Balhla chu tukthuanah ei tel theih a tha hle a, workout zawhah te pawh han hmawmsawm atan a tha khawp mai.
3. Spinach: He thlaihnah hring gram 80-ah hian potassium 545mg awm angin an chhut. Spinach hian magnesium leh vitamin a pai tam bawk a, a potassium pai nen lung tana chawtha ber zinga chhiar tel a ni. Chawchhun emaw zanriahah emaw ei tel thei thin ila a tha hle.
4. Alu: Alu ur (baked) pum laihawl-ah hian a kawr (skin) paih lovin potassium 926mg vel awm angin an chhut. Alu chu a fry tih vel aiin a ur hmin a ei zawk tur a ni.
5. Salmon: Sangha-ah pawh salmon hian poatssium leh omega-3 fatty acid a pai tam a, lung tana chawtha a ni. Potassium pai tam ber chu a ni lo nain, balanced diet atan salmon ei zeuh zeuh theih a tha hle.
6. Beetroot leh zikhlum: Beetroot leh zikhlum-ah hian potassium a tam mai bakah fiber leh inflammation tiziaawm nutrient a pai thei a, chaw chhun emaw zanriah atan emaw ei tel theih thin a tha hle.