Lungawilote sawrkarin la be pawp lo

Mizoram sawrkar hnuaia thawk, sawrkar hotute laka phut neih vanga a huhoa chawlh la mekte chu sawrkar hotu lam nen an la inbe pawp loa, lungawiloh hi vawiin – September 11 thleng kalpui tur a ni.
All Mizoram CSS Employees Coordination Committee (AMCECC) hruaituten sawi danin, sawrkarin an thil phut a la tihhlawhtlin loh avangin a ni hnihna atan NIlaini khan mass casual leave (MCL) an la chhunzawm a, Mizoram hmun hrang hranga an lungawi loh lantir chu member-ten an zawm tha hle.
Report an dawn chinah, Thawhlehni ang bawk khan Mizorama sawrkar hnuaia CSS-a thawktu an nawrh avangin sawkar hna kal lai leh ruahman sa engemawzat a khaihlak a. Training program leh activity dang pawh engemawzat a bahhlah phah. District hrang hrangah AMCECC Sub Hqrs ruahman angin MCL hi an la zel a. AMCECC Hqrs leh Sub Hqrs hruaituten an huamchhungah pisa kai an awm leh awm loh an vil reng a ni.
AMCECC hruaitute chuan an member-ten MCL an zawm that vangin lawmthu an sawi a. Lungrual taka thawkho zel turin an inngen. Sawrkara an lungawi lohna an lantir avangin mipuiin harsatna nasa tak an tawk mek tih an hriatin, mipui hriatthiamna an ngen tih an sawi a ni.
AMCECC-in thil phut neia mass casual leave an lak mek hi vawiin – September 11 thleng a awh dawn a. Hemi chhunga sawrkar atanga thu lawmawm emaw an lungawina khawp thu dawn a awm loh chuan an kal zel dan tur an ngaihtuah leh dawn a. Tun thlengin sawrkar atangin inbe tura sawmna ala awmlo tih an sawi a ni.
AMCECC hian sawrkara an thil phut – Regularization of CSS Employees Scheme 2024 a taka hman, Health department hnuaia PE health worker mi 31-te CSS Scheme hmanga a dahngheh sut leh, CSS hnuaia thawkte dan loa lak anga sawi chungchanga a mawhphurtu zawn chhuah leh action lak chu a hlawhtlin ngei an beisei tih an sawi a, a hlawhtlin hma chuan lungawi lohna hi kalpui zel an tum tih an sawi a ni.