Lunglei district-a bial ho a rualin chhiar vek dawn

Lunglei district-a assembly constituency paruk chu a rualin chhiar nghal a ni dawn a, round 4-a chhiar zawh tum a ni.
District election officer Ramdinliani kaihhruaia MLA inthlanpui vote chhiarnaa counting officials – counting supervisor, counting assistant leh micro observer-te 1st randomisation neihpui an ni a. Counting supervisor tur 57, counting assistant tur 57 leh micro observer tur 57 chu counting official turte database atangin computer-in a thlang chhuak a ni.
Second randomization-ah chuan counting supervisor, counting assistant leh micro observer-te chu an awmna tur assembly constituency-ah theuh computer hian random-in a dah dawn a. Third randomisation-ah erawh an thutna tur table theuh computer hian random-in a her chhuak dawn a ni. Second randomization hi observer hoa neih tura ruahman a ni a, December 2-a neih a ni ang.
Lunglei district-ah hian vote chhiar turin an inpeih tawh a, Saikuti Hall-ah counting room 6 siam niin,a rualin constituency 6-a vote tla chhiar a ni ang.Vote hi round 4-a chhiar zawh tura ruahman a ni a, postal ballot atang bul tanin zing dar 8.30 ah EVM CU chhiar theih tum a ni.