Lunglei district-a vote tlak thatna ber Sachan

MLA inthlanpui atana vote thlak zawh takah Lunglei district-a Assembly bial paruk atangin Thorang bial ami Sachan Polling Station chu vote tlak thatna ber a ni a, za zelah 98.40 a tla.
Lunglei district-ah hian Thorang bialah tho Marpara South-I Polling Station chu vote thlak zawh har na ber a ni bawk a. Zing dar 7.00 atanga vote thlak tan theih a nih laiin, Marpara S-I P/S ah hian zan dar 11.50 ah inthlan kaihhnawih hi an tifel ve chauh a ni. A bak Lunglei district-a polling station 176-ah chuan tha takin ruahman lawk angin vote thlak zawh vek a ni thung.
Inthlan laiin Lunglei district-ah hian boruak duhawmlo thleng report a awm loa, model code of conduct bawhchhiatna liantham sawi a awm lo bawk. Vote thlak theih hun tir lamah EVM leh VVPAT-ah polling party thenkhat ten harsatna neuh neuh tawk mah se, sector magistrate leh district level master trainer-ten buaipui thual zelin, tha taka inthlan neih a ni.
Lunglei district-ah Sachan PS hi vote tlak thatna ber a nih laiin, vote tlak tlemna ber chu 35-West Tuipui biala Tlabung Dinthar PS a ni a, zaa 40.49% a tla a ni. Tun tum inthlanpuia Lunglei district atanga vote thlak upa ber chu 33-Lunglei South biala Thingfal khua ami Nudari (104) a ni.