Lunglei district-ah TB vei awm lohna khua 18 tawh

Health department-in district a then danah Lunglei district leh Hnahthial district chu district khat a la ni rih a, he ‘Lunglei health district ah hian kum hnih chhung TB natna laka fihlim khua 18 an awm tawh.
Lunglei District TB (Tuberculosis) Forum chu an chairman, bawrhsap R Lalthazuala hoin October 4 khan an thukhawm a. Sawrkar official-te, NGO leh MJA aiawh leh TB champion-te an tel.
Thutkhawma tarlan danin, kum 2023 (January – December) chhungin Lunglei health district (Lunglei leh Hnahthial district) ah ngawr (TB) vei rinhlelh, CBNAAT khawla endik 1023 atangin TB vei hmuh chhuah 148 (chuap TB 101 leh chuap ni lo TB 47) an awm a. Mi 55 enkawl dam niin, enkawl dam (complete) 86 leh enkawl dam hman loh (failure) 1 an awm a. TB vei enkawl laia thi 7 an awm.
Kumin January – September chhungin Lunglei health district-ah TB rinhlelh CBNAAT khawla endik 688 atangin TB vei hmuh chhuah 113 (chuap TB 62 leh chuap ni lo TB 51) awmin, mi 6 enkawl dam an ni tawh a. Enkawl zawh dam fel 39 awmin, enkawl lai 65 an awm a. TB vei enkawl laia thi 3 an awm
District TB official-te chuan TB hrik en leh damlo enkawlna chu sawrkarah a thlawn vek a nih bakah Nikshay Poshan Yojna (NPY) hnuaiah damdawi ei chhung zawng thla tin Rs.500 pek an ni a, inenkawl zawh hnuah Rs. 750 pek thin an ni. TB chu enkawl hma a, tha taka damdawi ei chuan a dam hma in, harsatna nasa zawk a pumpelh theih tih an sawi a. Hei bakah hian TB veiten an inenkawl chhunga chaw tha an dawn theih nan mi inphal (Nikshay Mitra)-te hnen atangin tanpuina sum dawn thin a ni. Lunglei district-ah Nikshay Mitra (donor) 52 awmin, hemi sum hmang hian thla khatah damlo pakhat tan Rs.700 man hu ei tur tha leisaka pek thin an ni.
Lunglei district-a khaw tam thei ang ber TB awm lohna khua (TB free village) a puan a nih theih nana hma lakna kalpui mek sawi ho a ni a. TB free village ni tur hian kum khat (January – December) chhungin khaw khata mihring cheng zat azirin mi 1000 zelah 30 tal endik tur niin, mi 1000 zelah TB vei nemngheh 1 aia tam an ni tur a ni loa; TB vei enkawl hlawhtlin zaa 85 aia sang tur niin, TB veite chuan NPY leh Nikshay Mitra tanpuina an dawn ngei a tul.
Heng tehna hrang hrang atang hian kum 2023 khan Lunglei health district hnuaiah TB free village khaw 18 (Lunglei district-ah khaw 13 leh Hnahthial district-ah khaw 5) awmin, heng khaw 18 hian Mahatma Gandhi statue bronze leh citation an dawng a. A kum hnihna atana TB free village ni a, statue silver dawng thei turin inbuatsaih mek a ni. Kuminah khaw 40 chuang chu TB free village-a puan belh turin hma lak leh mek a ni.