Lunglei helna kawng siam tum thlirlawk
Lunglei helna kawng siam tum thlirlawk
Lunglei khawpui helna kawng (bypass road) sial tura ruahmanna chu Ningani khan Lunglei district bawrhsap R Lalthazuala kaihhruaiin sawiho a ni.
Lunglei khawpui helna kawngpui chu NHIDCL leh PWD atangin a kalkhan tha deuh nia ngaihte lo riruat lawk tawh a ni na in, kawng kalna tur thlanfel hnuah detail project report siam a, Ministry of Road Transport & Highways pawmpui tura thehluh theih chauh a la ni tih bawrhsap hian a sawi a. A kawng la thui viau mah se, a pawimawh lai ber a nih avangin Lunglei khawpui tana tha ber ngaihtuahna seng tlang a, ruahmanna siam turin a chah.
Sawihonaah hian Lunglei North bialtu MLA aiawh, Lunglei Municipal Council Ward No.I councillor Lalhruaitluangi Sailo, sawrkar department hrang hrang official-te, NHIDCL lam, District MJA, Joint Local Council leh Sub-Hqrs YMA president theuh, Pukpui, Zotlang, Rahsiveng leh Sazaikawn local council chairman-te leh YMA president-te an tel a. Lunglei bypass road atana NHIDCL-in kawng kalna tur (alignment) an ruahman chhin pali leh PWD atanga ruahman chhin pahnih thlir ho a ni.
Lunglei khawpuia lirthei tlan tih zangkhai dan tur, mipui tana awlsam, zangkhai leh mipuiin an chhawr theih dan tur, ei leh bara hmasawnpui theih tur, leilung leh chhehvel tana him tur, ram lak leh kawng siamna senso leh nghawng a neih tur hrang hrang thlir chungin rawtna sawiho a ni a. Lunglei mipui tana tha, awlsam leh tangkai ber tur nia ngaih, NHIDCL ruahman pahnih milin, PWD leh kalkhawm member-ten rawtna an neih rinlut telin, DPR ruahman nise, tih a ni.
Kawng tha leh tlo a awm theihnan leivung paihna leh leilung tana him ngaihtuah lawka ruahmanna siam tum nise, tih a ni bawk
Kawng kal dan tur riruang duan lawk dan chuan Lunglei bypass road hi Tlawng lei chhak, Saza Bangla chhak deuhah kawng pangngai atanga pengin, tlaklam zai zaiah fual deuh hlekin Lunglei khawpui a hel anga, Sazaikawn kawng peng thuam laiah a chhuak phei ang. A pen tanna atanga a tawp thleng hian km 21.55 vela thui ni tura ngaih a ni.