Lunglei khawpui fai nana LMC-in ruahmanna siam

Lunglei Municipal Council hnuaia Municipal Sanitation Committee chu Thawhlehni khan an thukhawm a. LMC-a a mawhphurtu bakah district bawrhsap office leh a kaihhnawih sawrkar department aiawh an tel.
Lunglei Municipal Council (LMC) in sanitation a lak hnuah local council 7-a sanitation kalpui tura ruahmanna siam leh street sanitation kalpui dan, side drain / drainage system rimchhia leh tihfai ngai, khawpui chhunga bawlhhlawh paihna hmun loa paih thin chungchang, faina inelnaa award siam bakah bawlhhlawh sawngbawl, damdawi in bawlhhlawh thliar hran, electric bana electric hrui ni lo, cable inzam hnawk nuai chinfel dan tur te an sawi a ni.
Sanitation lam bawhzui tawh danah, LMC-in bawlhhlawh khawnna tur veng 7 – Pukpui, Zotlang, Serkawn, Zohnuai, Bazarveng, Sazaikawn, Electric Veng atanga sanitation fee khawn zel dan turah Local Council/YMA branch nen ruahmanna an siam a; heng veng pasarih bakah LMC huamchhunga veng dang, mahnia bawlhlawh khawn thin – Ramthar, Rahsiveng, Venglai, Venghlun, Chanmari, Farm Veng, Salem, Lunglawn, Luangmual, Sethlun, Theiriat, Hrangchalkawn, Lungpuizawl, Zobawk North leh Zobawk South nen pawh bawlhhlawh khawn dan tur hi sawiho a ni tawh.
Sazaikawn atanga Luangmual panna kawnga bawlhhlawh a paihna hmun tur ni loa paihte report awm bawhzuia a hmuna endik a ni tawh a; Sobji Bazar-a bawlhhlawh dahkhawmna siam dan la ruahman tum a nih bakah LMC-in sanitation a lak hnua complaint chi hrang hrang – septic tank leak, bawlhhlawh paihna hmun tur ni loa paih, drain enfiah leh a dangte bawhzuiin vawi engemawzat an fehchhuak tawh tih an sawi a ni.