Lunglei khawpui tui harsatna
chinfel dan tur ngaihtuah ho
Public Health Engineering department engineer -in- chief Duhkima chuan Nilaini khan Lunglei khawpui tui lakna, Pialthleng tlawhin, PHED officials, Sub-Hqrs YMA Lunglei hruaitute leh Lunglei MJA nen tui harsatna sutkian dan tur an sawiho. Fur tui tam laia tui litre maktaduai 240 khuah tlin theihna, AMRUT 2.0 hnuaia cheng vaibelchhe 4 chuang senna tur hna thawh mek an enho bawk.
E-in-C chuan Lunglei khawpuiin kumin thal na avanga tui harsatna a tawh chu sawrkarin a hria a, a dinhmun enfiaha tui lakna pawh tlawh a ni tih a sawi. Thal khawro avangin tui hi litre maktaduai 10 velin a kiam a, hun pangngaia ni khata darkar 24 pump thin kha, darkar 8-9 chauh pump theih a ni, tiin, tuna Tlawng lui an khuah mek hian thla hnih chu mipui a chawm thei turah an ngai tih a sawi a ni.
Fur laia tui dahkhawlna neih a hlut zia hriat thar a tul a, lui kam ngaw kan vat chereu zel chu a pawi a, sum tam tak senga tui khuah a ngai tan ta tih Er Duhkima hian a sawi. Kumin March 10 atangin tui a kam tan tih PHE department-in a hria tih sawiin, mipuiin an dinhmun an hrethiam chu lawmawm a tih thu a sawi.
Kum 2015 khan Mat tui lak dan tur an ngaihven a, cheng vaibelchhe 987.93 hu DPR an siam chu sawrkar laipuiah a tlang zo ta lo tih a sawi. Tunah hian project te zawk, cheng vbch. 380 man potential project an siam mek a, funding an zawng mek tih a sawi bawk.
Sub-Hqrs YMA Lunglei hruaitute chuan tui khuah mek chu lawmawm an tih thu sawiin, siltation nasa lutuk awm thei lakah check dam siam theih ni se tiin E-in-C an ngen a. Lui kam (catchment area) humhalhnan YMA chuan inzirtirna kalpui a inhuam tih an hrilh. Lunglei MJA pawhin E-in-C hnenah hian lirthei liana tui sem dan ngaihtuah turin rawtna an siam a ni.
Lunglei khawpui tui harsatna chinfel dan tur ngaihtuah ho
Get real time updates directly on you device, subscribe now.