Lungleiah bus service tir dawn

Lungleiah bus service tir dawn
Lunglei Municipal Council chuan Lunglei khawpui chhungah man tlawm zawka mipui an veivah theihnan bus service tir an tum.
Lunglei Municipal Council Board of Councillors (BoC) chu an chairman Lalzuithanga kaihhruaiin a tum 9-na atan an thukhawm a. Thu ngaihtuah tura chhawpchhuah pali awmin, pathum chu a tul anga sawiho leh siamrem a nih hnuah bawhzui tura pawm a ni.
Lunglei khawpui chhungah man tlawm zawka mipui an veivah theihnan bus tlantir tura hma lak tha an ti a. LMC sum dinhmun thlirin, sum awmsa atanga hma lak theih a nih dawn loh avangin state sawrkarah a remchan dana bawhzui nise, an ti. Mizoram sawrkarin LMC tana sanctioned post 29 hnawhkhah phalna a pek tawh chu LMC budget awmsa atanga hlawh pek tur a nih dawn avangin sum dinhmunin a tlin tawk leh mamawh hmasa zual hnawhkhat tura hma lak phawt nise, an ti.
Mizoram Public Service Commission (MPSC) kaltlanga lak ngai post chi hrang 4-a post 5 hnawhkhat tur leh Municipal Service Selection Board (MSSB) kaltlanga lak theih zingah casual employee angin skilled 8 leh unskilled 5 la tura hma lak an rel.
Zawhna leh chhanna huna tarlan danin, Lunglei khawpui chhung kawngpui kama in sakna bungrua emaw bungrua eng chi pawh dah a nih dawnin LMC-ah ziakin dilna thehluh tur a ni, tia kumin July 1-a hriattirna (notice) chhuah a nih hnuah LMC-ah dilna 4 a lut tawh a; darkar 24 aia rei lo dah phalna pek an ni. June 25 khan Lunglei Municipal Council leh LMC huamchhunga local council-ten Lunglei khawpui chhungah mipui leh lirthei chevel him zawknan leh garage neilote felfai zawka enkawl an nih theihnan vantlang hmun leh kawngkama lirthei hun dan ruahmanna siam tura thawhdunna thuthlung (MoU) an ziahfel thu leh hemi kawngah hian ruahmanna siam leh hma lak mek a nih thu sawi a ni bawk.