Lungleiah chauh State University a awm chuan dawl zawh loh hlau
Lungleiah chauh State University
a awm chuan dawl zawh loh hlau
Lungleiah chauh Mizoram State University a inbun vek chuan sawrkar tan leh Lunglei tan dawl zawh loh mai a hlauhawm tih MNF hruaitu Prof F Lalnunmawia chuan a sawi.
Zirtawpnia Mizo Hnam Run inkhawmah MNF general secretary Prof F Lalnunmawia chuan, ZPM kaihhruai sawrkarin Mizoram State University (MZSU) Aizawla din tura Assembly House a pawm fel tawh, zan khat thilthua Lungleia dah a nih tur thu chief minister-in a puang ta thut khan mi tam tak a barakhaih hle tih a sawi a. Sawrkar laipui National Education Policy 2020 angin, central university hi zirbingna hmun (research intensive) atana ruahman a ni a, state university chu college affiliation petu a nih tawh dawn avangin Mizoram-a college-te pawh Mizoram University (MZU) hnuaia awm tawh loin MZSU hnuaiah an in-affiliate vek tawh dawn tih a sawi.
Assembly Session-ah MNF Legislature Party chuan Aizawla State University dah tura tih chu sut kher loin, Lungleiah pawh University dah ve mai nise, an ti tih sawiin, “Lungleia university dah hi Lunglei leh chhimlam mipui pawhin an phu hle. Lungleiah chauh State University dah ni ta se, Aizawl leh hmarlam zawnga college ho hi Mizoram State University hnuaia an in-affiliate a ngai dawn a, college-a thawkte meeting hrang hrang- Academic Council and School Board, Board of Studies, central evaluation, scrutiny, moderation adt. nei tura Lunglei an kal deuh fo a ngai dawn a, TA/DA ringawt pawh a hautak hle ang. Chumi piahlamah Mizo thalai, MZU-a seat changlo tam tak Lungleiah university an kal a ngai dawn tihna a ni a, chu chu an dawl zo angem tih ngaihtuah tel a ngai,” a ti.
Lunglei leh chhim lama university din chu MNF party-in tul a ti a, MNF sawrkar liamtaah pawh Mizoram University Southern Campus din turin theihtawpin hma an lo la tawh a, UGC leh ministry lamin MZU Southern Campus chu mahnia senso intum tura a tih tak avangin an puitlin hman ta lo tih Prof F Lalnunmawia hian sawiin, “State University hi a tira ruahman angin Aizawla dah a tul hle a, Lunglei leh chhimlam mamawh phuhru turin Lungleia university din pawh a tul hle,” a ti.