Lungleiah cyber crime inhrilh

Mizoram Journalists’ Association (MJA) leh Home department tangdunin district tin huapa cyber crime chungchanga hriat tur tul inhrilh hna a kalpui mekah Zirtawpni khan Lungleiah hman niin, internet kaltlanga pawikhawihna leh dan bawhchhiatna zirho a ni.
Hmanpuitu Lunglei High Powered Committee vice chairman V Malsawmtluanga, MLA chuan cyber crime chu tunlai khawvelah mitinin kan tuar a, Zoram kilkhawr berah pawh kan tuar nasa hle, tiin, a bikin politician-te phei chu a tuar nasa zing ami an ni tih a sawi. Thudik tawk lo leh dik ziktluak lote dawt hmanga inchirhthehna avangin mi tam takin harsatna leh hmingchhiatna an tawk thin a, dan kengkawhtute pawhin huaisen taka hrem ngai hrem ngam tura an insan mar a tul hle tih a sawi a ni.
Seminar hi MJA Gen. Hqrs president C Lalrambuatsaiha’n a kaihruai a. MJA Lunglei District president Laltlanthanga’n inlawmna thu a sawi a. Lunglei MJA member-te bakah District Police leh tlawmngai pawl aiawhte telin, Mizoram Police Cyber Crime Cell inspector MS Dawngliana’n cyber crime awmzia leh a kaihhnawiha pawihkhawih leh inbum theih dan hrang hrang leh a hrem theih dan bakah cyber crime laka inven dan tur a zirtir a ni.