Lungleiah raltlan tan sumdawn phal lo

Lungleiah raltlan tan sumdawn phal lo
Lunglei Municipal-in a huamchhungah Lunglei Municipal Council (LMC) phalna lo chuan sumdawnna reng reng kalpui phal a ni tawh loa, raltlan phei chu phalna pek theih a ni lo hrim hrim dawn.
LMC Board of Councillors an chairman Lalzuithanga kaihhruaia thukhawm chuan The Mizoram Street Vendors (Protection of Livelihood and Street Vending) Regulations 2017 chu LMC huamchhunga hman turin a pawm a. The Lunglei Municipal Council Licensing Regulations 2024 sawi angin, LMC huamchhungah sumdawng reng rengin phalna an neih ngei a ngai a, phalna nei lo sumdawn khap a ni. Raltlan bik chu phalna hian a huam loa, dawr luah leh khawlaia sumdawnna atan pawh phalna pek theih an ni lo tih sawi a ni.
Hemi chungchangah hian tuna dan pawm tak hmang hian fel taka hma lak tum niin, a tul anga bawhzui turin LMC chief executive officer Donny Lalruatsanga ruat a ni.
LMC-in kum 2024- 2025 chhunga parking fee a hmuh Rs. 18,31,349 atanga BoC-in hmanna tur a ruahman sa Rs. 4,86,275 bak hmanna atana LMC Traffic & Transport Coordination Committee (TTCC) in a rawtna sawiho a ni a. Tuiluankawr khuhna tha lo siamthatna atan, kawng leh kawngsir kea kalna daidanna pal (railing) rawng hnawihna atan, kawngpui luan chin baka lung phahna atan, kawngkual laia darthalang (convex mirror) dahna atan leh kawnglai cheina leh tilang fiahtu eng (reflector /road stud light) vuahna atana hmang tura TTCC rawtna chu BoC hian a pawmpui. Ruahmanna kalpui turin TTCC kutah dahin, khawpui laili deuh leh a tul zual laiah hna bul tan tha tih a ni.
Thutkhawmah hian Executive Council-in Lunglei Day hman chungchanga rawtna a thlen chu BoC chuan NGO hrang hrang leh Lungleia rawn awm mi deuhte nen zau zawka inrawntlan hmasak nise, an ti.