Lungleiah Science Day

Lunglei Science Centre (LSC) leh Mizoram Science Technology and Innovation Council (MISTIC) tangdun buatsaihin Inrinni khan LSC-ah National Science Day 2024 denchhenin hun hman a ni a. Lunglei Govt College-a Department of Chemistry zirlaite bakah Jawahar Navodaya Vidyalaya School Pukpui zirlaite an tel.
National Science Day hi kumtinin February 28-ah hian India ram pumah scientist Dr CV Raman-a’n ‘Raman Effect’ a hmuhchhuah ni denchhena hman thin a ni a. Kumin hian ‘Indigenous Technology for Vikshit Bharat’ tih thupuia hmangin ram pumah hma lak a ni. Zirlaite leh mipui nawlpui zingah zau zawka puandarh a nih theih nan February 26 atang khan hman tan a ni a. Mizoramah chuan a lawmna pui ber hi February 28 khan Innovation Facility Centre Aizawlah neih niin, district hrang hrangah thupui then hrang hrang hmangin programme hman chhoh zui a ni.
Lunglei Science Centre-a Science Day-ah hian ‘Science with fun’ tih thupui hmangin hun hman a ni a. Assistant professor Dr Joseph Lianbuanga chu resource person niin, science zir chu thil nuam leh hlimawm tak a nih dan a sawi.