Lungleiah State University kan dah ang – C Ngunlianchunga

Lungleiah State University kan dah ang
– C Ngunlianchunga
Kum 2028 MLA inthlanpuiah Congress a sawrkar chuan Lungleiah State University an dah dawn tih Congress hruaitu C Ngunlianchunga chuan a sawi.
Zirtawpnia Congress Bhavan-a inkhawmah MPCC vice president C Ngunlianchunga chuan, Aizawla State University din kan tum chu ngaihtuah that a ngai tih a sawi a. Aizawlah zirna in pawimawh – MZU, NIT, ZMC, RIPANS, MCON, Law College, IASE, Vety College, ICFAI leh college lian tak tak a awm tawh a, chutih laia Aizawl bawka din tum a ni chu kan ti mah mah deuh nia sawiin, Mizoram hmasawnna ngaihtuah a, hmun dang tihmasawn ve a ngai tih a sawi.
RUSA guidelines vangin Aizawlah bak a dah theih loh nia sawi chu hriatsual nia a hriat thu Congress MLA hian sawiin, “Lunglei Govt College, JB College, DIET, HATIM leh Polytechnic a awm a, tunah Engineering College din thar a ni. University nei thei turin institution 5 an neisa a, RUSA guidelines-ah mainland India tan college 3-5 ngai an ti a, hei hi Northeast region tan 2-3 ah an relax. Relax lo pawh nise Lunglei hian a pha tho tho. RUSA guidelines angin zirlai 2000 a ngai a, tunah zirlai enrollment 2030 an ni. Engineering College an nei dawn bawk. NEP leh RUSA beisei angin zirna pawh a interdisciplinary zual dawn a, a chhan chu School of Engineering Science an nei tel dawn a ni,” a ti.
Nagaland chuan Lumani-ah Central University a dah a, Kohima-ah campus a nei ve chauh a. NIT pawh Dimapur ah a awm tih a sawi. Meghalaya-in tunhnaiah State University a din a, Tura-ah daih dahin, Assam-in Central University pahnih a neih chu Tezpur leh Silchar-ah a dah a, Guwahati-ah a dah ve lo tih a sawi.
“Cachar district hi Assam hian eng angin nge a ngaih kan hre theuh ang, mah se, Central University leh NIT pawh Silcharah a dah a ni. Kum 2028 ah Congress kan sawrkar a nih chuan Lungleiah Engineering College kan din sak angin State University pawh hi kan din leh ang,” a ti.