Lungleiah Vohbikte pual kût Purple Fair buatsaih

Lungleiah Vohbikte pual kût Purple Fair buatsaih
Nimin khan Government High School, Lunglei tualah vohbikte puala intihhlimna kut, “Purple Fair for Persons with Disabilities” buatsaih a ni.
He Kût hi Department of Empowerment for Persons with Disabilities (DEPwD), Ministry of Social Justice & Empowerment (MoSJE) atanga ruahman angin National Institute for Locomotor Disabilities – Regional Centre (NILD RC) Aizawl; District Social Welfare & Tribal Affairs Office (DSWTAO), Lunglei leh District Project Office (DPO), Samagra Shiksha, Lunglei te tang ho huaihawt a ni.
He hun hmanpuitu Lunglei High Powered Committee (HPC) Vice Chairman V. Malsawmtluanga chuan Lungleia a vawi khatna atana vohbikte tana Purple Fair buatsaih a ni chu hlu leh lawmawm a tih thu sawiin, a buaipuitute chungah lawm thu a sawi a. India sawrkar leh Mizoram sawrkarin vohbikte hmasawnna a ngai pawimawhin, an tan theih tawpin hma a la tih sawiin, an hmasawnna leh hamthatna tur dan tha tak tak pawh duan a nih thu a sawi. Mizoram sawrkar hna lakah pawh vohbikte tan post hauh thin niin, vohbik tam takin mahni kea din nan leh chhungkaw chawm nan an hmang tawh tih a sawi.
V. Malsawmtluanga chuan Vohbikte tana sawrkar hma lakna thenkhat tarlangin, Indira Gandhi National Disability Pension Scheme (IGNDPS) hnuaia vohbikte hnena pension pek thinah Mizoram sawrkarin thla tin Rs 100 a pek thin chu April 2024 atangin Rs 1,000/-ah tihpun a nih thu leh sawrkar laipuiin thla tin Rs 300/- a pek nen belh khawmin thla tina an pension hmuh chu Rs 1,300/- a nih tak thu a sawi a. State Disability Pension Scheme hnuaia Mizoram sawrkarin vohbik zinga chhawmdawl ngai bik, mitdel leh khum bette tana kum khata Rs 4,200/- chhawmdawlna a pek thin chu kum 2024-25 sawrkar kum thar atangin Rs 6,000/-ah tihpun a nih thu a sawi a. Handicapped Students Stipend hnuaiah kum khatah vohbik zirlai – primary school zirlaite hnenah Rs 800/-, middle school zirlaite hnenah Rs 1,000/- leh high school zirlaite hnenah Rs 2,500/- pek thin a nih thu a sawi a. National Divyangjan Finance and Development Corporation (NDFDC) kal tlanga vohbikte’n loan a pung tlem chi an lak theihna chu Lunglei District-ah pawh kalpui mek a nih thu leh vohbik lehkha thiam, District Employment Office-a inziak lutte tan kum khatah Rs 7,800/- pek thin a nih thu a sawi bawk.
Purple Fair hawnna hun hman zawh hian vohbikte thil siam chi hrang hrang pho chhuahna leh zawrhna bekte (stall) chu khuallianin a fang kual a. TNT Home Lunglei, Training Centre for Specially Abled Persons Lunglei, ALIMCO PMDK Aizawl leh vohbik mimal pahnih dangin stall hi hawngin, an thil siam chhuah hrang hrangte an phovin an zuar a ni.
Lunglei Purple Fair-ah hian TNT Home Lunglei, Onyx Special School Lunglei, Jehova Nishi School, Play Stop, Training Centre for Specially Abled Persons Lunglei leh hmun hrang hrang atangin zirlai leh vohbikte an kal khawm a, cultural programme leh infiamna chi hrang hrang hmanga intihhlimna (sports & games) hun hman zui niin, vohbikte’n an thiam thil chi hrang hrang – zai, changvawn sawi, lam leh thil dangte entirin, infiamna chi hrang hrang – wheelchair hmanga intlansiak, inkut elh, intlansiak, inhrui pawh, disposable cup challenge, chip matching challenge leh blind hit hmang te’n intihhlimna buatsaih a ni bawk.
He hunah hian ALIMCO PMDK te chuan Assistance for Disabled Persons (ADIP) Scheme kal tlangin vohbik mi 22 hnenah leh Rashtriya Vayoshri Yojana (RVY) kal tlangin upa kum 60 chung lam mi 12 hnenah ri hriatna leh chet velna atana an hmanraw mamawh chi hrang hrang – wheelchair, bengdar, mitdel tiang, zakdawh tiang leh hmanraw dangte chu a thlawnin an pe a ni.