Macau Open semi lut Mannepalli leh Sen

Tharun Mannepalli chuan a career-a a vawi khatna atan BWF 300 tournament semi-final a lut a, he dinhmun thleng tur hian nimin khan Indian shuttler hian rim taka thawkin World No 87 Chinese Hu Zhe chu minute 75 chhungin 21-12 13-21 21-18-in a hneh.
Kum 23-a upa Mannepalli hi tunah world number 47 ni mekin, BWF Super 300 event-a last four a luh hma hian kumin February thla khan he level inelna tho German Open-ah quarter-final a lo thleng tawh bawk a ni.
Kum li kal ta khan Mannepalli hian India rama badminton zirna hmun lar Pullela Gopichand Academy zawmin, a thawhrimna chuan hlawhtlinna sang zawkah a hruai hret ret a, Macau-ah hian last 16 lamah pawh top seed Lee Cheuk Yiu of Hong Kong a lo vaw tla ngat tawh a ni.
37th National Games gold medallist Mannepalli hian India rama coach lar leh ngaihsan hlawh Pullela Gopichand a belhbul hmain Telangana state-a Khammam khuaah kum riat mi lek ni chungin badminton a khel tan a; pawl 10 a pass hnuah thuk zawka badminton luhchilh turin Hyderabad a pan ta a ni.
Nimin vek khan India top shuttler Lakshya Sen pawhin quarter-final match pakhatah ranking lama hniam zawk Chinese shuttler Zhu Xuan Chen chu 21-14, 18-21, 21-14-a hnehin semi-final a lut a, tun hi kumin chhunga tournament a hmachhawn tum 11-na a nih rualin kumin bika last-four a chuankai vawi khatna chauh a la ni!
World No 17 Lakshya Sen hian World No 25 Alwi Farhan of Indonesia tum lehin, a chipui Mannepalli chuan final luh inchuh match dangah Malaysian shuttler Justin Hoh a hmachhawn ve bawk.
Men’s doubles lamah Indian pair Satwiksairaj Rankireddy leh Chirag Shetty an dam zo ta lo thung a, quarter-fial match pakhatah 14-21, 21-13, 20-22-in Malaysian pair Choong Hon Jian leh Haikal Muhammad-te’n an hnawtchhuak.