Madhya Pradesh speaker rawn zin

Madhya Pradesh speaker rawn zin
Zankhat riaka Mizoram rawn tlawh Madhya Pradesh Legislative Assembly speaker Girish Gautam leh a thawhpuite chuan Nilaini khan Aizawl an thleng a, Assembly speaker Lalrinliana Sailo nen an inkawm.
Mizoram Assembly speaker chuan Girish Gautam leh a thawhpuiten Mizoram an rawn tlawh chu lawmawm a tih thu a sawi a. Mizoram chu ram nuam leh ralmuang, vantlang nunphung khaihlak zawnga chetna awm lohna a ni, tiin, Mizoram chanchin tlangpui a hrilh.
Madhya Pradesh speaker chuan India chu hnam ziarang leh tawng hrang tam tak awmna ni mah se, mitinte chu India leilung fate vek kan ni, tiin, Mizoram inthlan hrang hrangah vote thlaktu thahnem tak an awm thin chu entawntlak a tih thu te, Madhya Pradesh pawhin kumin kumtawpah Mizoram ruala inthlanpui an hmachhawn ve tur thu te sawiin, tluang taka mipuiin roreltu an thlan theih nan duhsakna a hlan a ni.
Girish Gautam leh a thawhpuite hian hmarchhak state pali – Tripura, Mizoram, Assam leh Manipur an tlawh dawn a. Mizoram Legislative Assembly hnuaia Financial Committee hrang hrang – Public Accounts Committee, Estimates Committee leh Committee on Public Undertaking te hnathawh dan bakah ‘paperless assembly’ e-Vidhan kalpui dan an zirchiang dawn a ni.
Madhya Pradesh speaker hi Assembly Public Undertaking Committee chairman Gauri Shankar Bisen, Public Accounts Committee chairman PC Sharma, MLA Divvaraj Singh leh official dang ten an tawiawm a ni.