Madonna leh Akeem an inhual em ni?

Madonna leh Akeem an inhual em ni?
Madonna chuan a zungte û-ah lunghlu zungbun thar bunin, a tilang lui deuh ngat zel bawk a, a ngaihzawng, amah aia kum 38 zeta naupang zawk, Jamaican footballer Akeem Morris nen an inhual ta niin report a awm a, mahse, he thu hi Madonna leh a thupuangtu lam chuan engmah an la sawi duh lo.
Madonna hian a zungte û veilamah ngei mai zungbun thar hi a bun a, a thlalak hrang hrangah a zungbun thar hi a dah langsar thei riau lenghal a, January ni 2-a Instagram-a thlalak hrang hrang a post zinga pakhatah chuan Madonna, kum 66, leh Akeem, kum 28, te hi inchhungah an kal dun lai langin, Madonna hian a zungbun thar hi a pholang lui deuh ngat a, a caption-ah, “Hei le Hmangaihna nasa zawk atanga naupang te hlimna te ngaihtuahna leh hriselna tha zawk atanga chatuan malsawmna thlengin,” a ti a, “He dam chhung nuna mihuaisen te leh midang zawng zawng te ka chawimawiin an chungah lawmthu ka sawi e,” a ti bawk. Madonna hian Akeem nena an thlalak chi hrang hrang a post zingah inthlakhlelh hmel taka an inpawm deuh chial lai te pawh a tel.
Madonna hian a fanu thlalak a post zinga a zungbun thar chiang set sawta a lanna a post tel a, chutah chuan tlereuh designer Julie Y.Kim a tag a, Julie hian a Instagram-ah chung thlalak chu post nawn ve lehin, a caption-ah, “Kiss the ring,” tih a dah tel a, hei hian Madonna te hi an inhual ta ni ngeia ngaihna a tilian lehzual ta a ni.
Madonna leh Akeem te hian an inngaihzawng thu hi official-a puanna an la nei hran lo a, chutihrualin social media vela an pahniha thlalak dun han tarlan vel erawh an insum lem lo khawp mai a, nikum August thlaa Italy-a Madonna pianchampha an lawm tum pawhin Akeem hi Madonna fate Lourdes Leon, kum 27, Rocco Rotchie, kum 24, David Banda, kum 19, Mercy James, kum 18, leh phir Stella leh Estere, kum 12 te zingah pawh a lo tal pawl ve tawh a, an chhungkaw Krismas lawmna thlalakah pawh Akeem hi a lang ve nual tawh bawk a ni.
Madonna hi 1985-1989 khan actor Sean Penn nen inneiin, 2000-2008 thleng director Guy Ritchie nen an innei leh a, 2022-a YouTube video pakhatah Madonna hian pasal tum hnih a lo neih tawh te chu a tihsual thu leh a inchhir thu a lo sawi tawh a, tun tumah hian inhualna zungbun niawm tak a bun thar leh ta a ni.