Madrid derby-ah chak zawk awm lo

An elpui lian ber Giro-na laka fal zawka hma-hruai theihna hun tha nei chungin Pathianni zan Madrid derby-ah mual-neitu Real an chak zo lo a, mikhual Atletico nen sikhat ve ve thuna in-hnehtawkin, kum 2015-16 hnu lama a vawi-khatna atan Bernabeu club lakah Atletico-in La Liga season khatah point li an thawkchhuak.
Brahim Diaz chuan minute 20-ah mualneitu team hmahruaina goal khungin, Koke siamsak atangin Jan Oblak-a dan zawh loh goal chu hnai set sawt atangin a tilut a, he goal khat hi Real Madrid-in an chakpui thei mai dawna a lan hnu hun pekbelh minute thumna a kal mek laiin Marcos Llorente chuan Memphis Depay-a tauhpial nang fuhin Atletico Madrid siphurh a sut a; a hmain centre-back Stefan Savic chuan Antoine Griez-mann-a corner chhuih atangin mikhual siphurh sutna goal tauhlut bawk mah se offside vanga hnawlsak a ni.
Real hmahruaina goal thawhtu Brahim kha warm-up laia inhliam Vinicius Jr hmun luah turin last minute-a dahluh a ni a; Llorente siphurh sutna goal kan hmuh hma khan a goal hnihna leh home team chak nem-nghehna ni thei tura ngaih goal thun turin chance a hmu a, mahse, kual zeta a chhuih chu goal ban sirah a chhuak hlauh a ni.
Diego Simeone-a team lam pawhin goal khung theihna hun tha bawhpelh ve zelin, tun-hnaia Kepa nekchhuaktu Real Madrid keeper Andriy Lunin chuan pui takin Axel Witsel-a tauh-luh tur a dansak a, a hnu-ah Griezmann-a goal lawm tur a thulhtir leh.
Pathianni zan San-tiago Bernabeu inkhel kha kumin 2024 chhung bika Madrid club lian pahnih vawithum intawn-na ni tawhin, Spanish Super Cup-ah khan extra time khelh zawhah 5-3-in Real an chak a; Copa del Rey-ah pawh extra time khel lehin, tah thung khan 4-2-in Atletico a chak a, tunah erawh chak zawk awm loin team pahnih an inthathen.
Inrinni zan khan hma-hruaitu ni chho ve reng Girona pawhin goal awm loin Real Sociedad an lo inhnehtawkpui tawh a, Carlo Ancelotti team-in an elpui lianber nena an inkar pawhzau lehzual theihna hun remchang nei mah se Madrid der-by-a hnehna an chan zawh bik loh avangin pahnihna luah ve leh ta rih Girona lakah point hnih chiah an sang.
Defending champion Barcelona chuan Inrinni khan 3-1-a mualneitu Alaves hnehin La Liga table-ah pathumna an luah chhunzawm a, an chung chiaha chuang Girona lakah point ruk laiin an la hnufual.