Madrid lamah Spanish Grand Prix sawn dawn

Kum 2026 atang chuan Barcelona atangin Spain ram khawpui ber Madrid lamah Spanish Grand Prix an suanlut tawh dawn.
Tuna he grand prix dawltu ni mek Circuit de Barcelona-Catalunya hmunah hian kum 1991 atangin Spanish Grand Prix hi an la tlan ngar ngar a; kum 2026 atang chuan Madrid leh Barajas airport inkara Ifema exhibition centre-ah race sawn a ni dawn a, he tlankawng thar hi km 5.47 (3.399-mile)-a thui tur a ni.
Kum 2030-a lirthei khuin boruak hlauhawm a pek-chhuah (greenhouse gas emission) tihbo hman tum tawh Formula 1 chuan Mad-rid-a tlan tan tur 2026 Spanish Grand Prix chu an calendar-a an thiltum hnaih chho hnaivai race zinga mi a nih tur thu an puang.
F1 thuchhuah chuan Madrid race an tlan hunah chuan intlansiak en tur fans zinga 90% zet chuan mahni lirthei hawlchhuak tawh loin public transport (metro & train lines) hmangin tlankawng an pan tawh tur thu an tarlang tel.
Madrid track tharah hian corner 20 a awm dawn a, street-circuit leh road-course section inpawlhna a nih tur thu F1 thuchhuah chuan a tarlang tel.
An ruahman dan chuan nitin a hmuna fans 110,000 leng thei tur leh 140,000 thleng leng thei tura tihlen tum a ni a, an puitlin hunah chuan F1 calendar-a F1 race tlanna lian berte zinga mi a ni chho thei dawn.
Kum 2035 thleng daih tura contract an ziahpui Madrid hian kum 1981 hnu lama a vawikhatna atan an rama tlan thin grand prix an dawl dawn a; he khawpuia an tlan hnuhnunber tum chuan Madrid atanga hmar lam mel 20-a hla Jarama circuit-ah race nghah a ni.
Kum 1991 atanga Circuit de Barcelona-Catalunya lama an nghah hma kum 1986-1990 chhung khan Jerez, Andalucia-ah tlanin, Spanish Grand Prix hmasaber chu kum 1913 daih tawha tlan tan a ni a, khawvela race upaber zinga mi a ni.
F1 president leh chief executive officer ni bawk Stefano Domenicali chuan Formula One-in Barcelona khua a hawisan nghal hmiah loh thu leh a hmalam hun atan remchang a thlir mek thu a sawi a, Madrid kalsan si loin Spain leilunga race dang atan Barcelona an la hual reng tih a sawi.