Madrid Open-a Norrie hneh loh Zhang-a

Madrid Open-a Norrie hneh loh Zhang-a
British number one ve lai Cameron Norrie chuan tun kartir Thawhtanni khan a tumkhatna atana ATP Masters 1000 third round match khel ve chiah Chinese player hriat hlawh lo Zhang Zhizhen a hneh lo ringawt!
Chinese mipate zinga ATP ranking-a top 100 huang luah hmasaber Zhang-a hian world number 99-na luah chungin Madrid khaw tournament lian a hmachhawn a, kumin Madrid tournament hma hian ATP Masters 1000 match-ah chak a la nei ngai lo lehnghal a, mahse, world number 13-na ni mek Norrie lakah kum 26 mi hian 2-6 7-6 (7-2) 7-6 (7-2) hnehna changin, Chinese mipa tennis player zinga Masters 1000 event round four lut thei hmasaber a ni nghal.
Norrie tan tun kha a match khelh hnuhnung vawisariha a vawinga tlawmna ni tawhin, thla hmasa mai khan Barcelona Open second round-ah tlawm tawh bawkin, Monte-Carlo Masters leh Miami Open lamah phei chuan first-round a paltlang zo lo.
Zhang hian Madrid khaw tournament kal lai opening round lama hnehna a chan kha ATP 1000 match hnehna a chan vawikhatna niin, Canadian Denis Shapovalov a hneh kha top-30 ranked player laka a chak vawikhatna a ni bawk.
Court three lama third round hnehna a sualchhuah hnuah court three mipuiin ‘standing ovation’ nen Zhang-a khelmual chhuahsan tur an thlahliam a, quarter-final luh inchuh match pakhatah Ameri-can number one Taylor Fritz a hmachhawn leh ang.
Fritz hian 6-1 7-6 (7-4)-a Chilean Cristian Garin hnehin fourth round a lut ve bawk.
Russian world number two Daniil Medvedev leh Greek world number five Stefanos Tsitsipas-te pawh chak zingah an tel.
Medvedev hian a umtu zawk a nih hnuah a chipui Alexander Shevchenko chu 4-6 6-1 7-5-in a vaw chhuak a; Tsitsipas chuan Argentine Sebastian Baez lakah 7-5 3-6 6-3 hnehna a chang ve bawk.
American ninth seed Frances Tiafoe erawh 6-1 7-6 (7-2)-in Pedro Cachina Ar-gentina lakah a tlawm thung.
Women’s draw lamah second seed Aryna Sabalenka leh world number three Jessica Pegula-te’n quarter-final an lut ve tawh bawk.
Belarusian Sabalenka hian Russian wildcard Mirra An-dreeva lakah 6-3 6-1 hnehna nuamsa changin, Australian Open champion Sabalenka hian Egyptian zinga WTA 1,000 quarter-final lut hmasaber Mayar Sherif a tum leh dawn a, he hmunthleng turin Elise Mertens lakah 6-4 0-6 6-4 hnehna a sualchhuak.
American Pegula thung chuan set khat hloh chungin Martina Trevisan lakah 6-3 2-6 6-3 hnehna a chang a, Russian Veronika Kuder-metova a tum leh ang.
Thawhtanni vek khan French leh US Open champion ni chunga Madrid-a first seed chang Iga Swiatek pawhin last eight lutin, Poland world number one hian Russian Ekaterina Alexandrova chu 6-4 6-7 (3-7) 6-3-in a hneh a, Croatia nula Petra Martic a tum zui leh.