Maharashtra-ah la inrem thei lo, Shinde-a fapa deputy CM turin sawi ri
Maharashtra-ah la inrem thei lo,
Shinde-a fapa deputy CM turin sawi ri
BJP chuan Finance Minister Nirmala Sitharaman leh Gujarat chief minister hlui, Vijay Rupani te chu Maharashtra MLA thlan tharte thutkhawmpuitur tur, ‘observer’ atan Thawhtanni khan an ruat a, chief minister thar tura an buaina pawh an chin felpui beisei a ni.
Tu nge chief minister ni dawn tih puan chiah la awm lo mah se BJP hruaitu hlun leh chief minister vawi hnih lo ni tawh, Devendra Fadnavis chu rin kai ber a ni.
BJP hi thla hmasaa an state assembly inthlanah khan Eknath Shinde kaihhruai Shiv Sena leh Ajit Pawar-a kaihhruai National Congress Party (NCP) nen hneh takin thlan tlin an ni a; mahse, tangho pathumte hi chief minister thar tur atan an la insawi fel hlei thei lo.
Kar hmasaah khan thutlukna siam niin chief minister chu BJP an ni ang a, an thawhpui party pahnih atangin deputy an awm ang tih a ni a; mahse, hei hi a takin an la kalpui thei lo.
MLA 288 awmna assembly-ah hian BJP hi party mala MLA ngah ber niin 132 an nei a, Shinde-a Sena hian 57 neiin NCP-in 41 an nei bawk.
BJP hian MLA 145 an neih tlin loh avangin anmahniin an sorkar ngawt thei bik lo va, an thawhpuite puihna an ngai a ni.
Hetih rual hian BJP hian Shinde-a puihna tel lo vin, Pawar-a thlawpna ringawt pawhin an sorkar thei a. Hei vang hian chief minister nih pawh an chuh na ngam a, chief minister kal chhuak tur, Shinde-a leh a kaihhruai party chuan an la chan turah an duh ve tlat bawk si a ni.
Kar hmasaa inpawhna nasa tak a awm hnuah Shinde-a hi an khua, Satara district-ah a haw a, hei hian boruak nei deuh mah se inthlan buaia a buai lutuk atanga chawl hahdam angin sawi a ni thung.
Satara-a a awm lai hian BJP chuan chief minister thar chu December 5 tlai dar 5:00-ah Mumbai-a Azad Maidan-ah lak luh a ni dawn tih an puang a, Prime Minister Narendra Modi-a a tel dawn tih an puang.
NCP hian BJP thlawp zuiin Pawar-a pawh deputy chief minister a ni dawn nia sawi a ni.
Hetih lai hian Shinde-a fapa, Shrikant Shinde chu deputy chief minister a ni dawn tih sawi rik a awm mek a. Shinde junior hian hei hi thil tak tak a ni lo niin a sawi.
Shinde-a fapa hian X-ah he thil hi ‘sawi ho mek leh titi mai mai’ tiin a sawi a. Deputy chief minister anga sawina chu, ‘Tun dinhmunah chuan thu dik a la ni lo, deputy chief minister tur anga min sawi hi tanchhan mumal nei lo vek a la ni rih,’ a ti.