Mahindra XUV3XO Mizo Inchai Title Fight 2024
LPS Arena, Falkland-a December ni 9-11, 2024 chhung awh tur Mizo Inchai Title Fight zan khatna Thawhtanni zan khan inchai hmuhnawm tak tak phochhuah niin, nizanah nute leh pate title fight bakah exhibition bout engemawzat kan thlirliam a; zanin hian XUV3XO Mizo Inchai Title Fight 2024 hmawrbawknaah nulian leh palian title fight thlir tur a awm leh ang.
Thawhtanni zan inchai result thlir ila.
Palaihawl title fight-ah champion lai Remruatpuia (Bethlehem Vengthlang chuan thawh 10 inchaiah 49-3-a Ngursangzuala (Saitual) hnehin a title kawl lai a humhim.
Ruatpuia hian a champion kawnghren a humhim manah Rs. 50,000 a dawng a; Ngura’n Rs. 30,000 hlawhchhuak.
Nulaihawl title fight-ah pawh champion lai Elizabeth Rohlupuii (Melriat)-in a title kawl lai humhimin, Penticost Lawmsangpuii (Champhai) lakah 59-0 hnehna a sualchhuak.
Kawng engkimah Hlupuii a chung nung a, thawh nga an inchai chhungin thawh tinah vawi 10 chhiar thleng a bawhbet vek.
Thawh khatnaah tum hnih bawhbetin a hmasa zawkah vawi ruk chhiar a nih hnuah Sangpuii a talchhuak a, a bet zui ta tho.
Thawh hnihnaah bawhkhupin vawi thum chhiar thleng a bawhbet leh a, Sangpuii talchhuak leh mah se a hnuah vawi 10 chhiar thleng a bet zui leh tho a ni.
Hlupuii’n champion kawnghren humhimin Rs. 50,000 a dawng a; Sangpuii’n Rs. 30,000 a dawng ve bawk.
Title fight bakah hian Freestyle Wrestling (exhibition) thlirliam a ni a, he huanga inchaite’n Rs. 2,500 vek an dawng.
Mahindra XUV3XO Mizo Inchai Title Fight 2024
Get real time updates directly on you device, subscribe now.
Prev Post
Next Post