Mahni insiam chawp harsatna…

Fur laiin thenawm state-a inkalpawhna a chhiat avanga bungrua a lo luh theih loh chang te, lungawilohna lantir nana kan state chhunga ei bar lo lut tur dang chata thenawm state ten economic blockade min huaihawt khum changte kha a awm thin a, khang harsatnate kha state pawn lam thil thleng avanga lo awm thin a ni.
Tunah chuan, thenawm state atanga kan mamawh tinreng lo lut tur, lo luh tum, lo luh duh em em, keimahni pawhin lo lut se kan tih ngawih ngawihte chu an lo lut thei ta hauh lo mai a. Hei hi a chhan chu, keimahni state chhung ngeia keimahni enkawl lai mek kawngpuite lirthei zawh theih loh khawpa a chhiat nasat tak vang a ni.
Han ngaihtuah chian chuan, a mualphothlak a, a zahthlak a, a huatthlala bawk. Harsatna kan tawh dante hi, khuarel chhiatna avanga lo awm aiin, keimahni siamchawp avanga lo awm/thleng hi a tam zawk daih awm e.
Tuna sawrkar thar hian, furpui thlen hma khan kawng chhe zual lai hi lo repair hman/thei tehreng pawh ni se, tun ang harsatna (kawng chhia ena minister-te thawhchhuah suau suau ngai ang chi) hi a thleng lo pawh a ni thei e; mahse, sawrkar kalta te tih ang bawkin, fur khat pawh tuar chhuak hleithei lo kawngpui hi term khat chhunga mipui ten kan hmachhawn zui tur chu a ni chho ve mai ang tih pawh a hlauhawm hlel lo a ni; rinthu mai phei zawng a ni a.
Tun leh tunah chuan, lirtheite an lo lirh luh a, an thlenna tur hmun an rawn lirh thlen hrim hrim a ngaih avangin phuahchawp takin kawng an hai rual nial nual rih mai a ni a. Fur ruahtui han hul se, working season (politician-ten an tih angin), kawng tha tak siamna hun thawl tha em em mai, chhuanlam atana ‘ruahtui’ hman tur awm tawh loh hun a lo thleng chho tan dawn a. Khawpui ber Aizawl chhung kawngpuite pawh hi hma tel nghal a ngai. Kawng a chep tawh nak alai a, khuar (potholes) hlira a khat mai te hi, a nihin a ni lo a, a zialo em em hi a ni ringawt mai.
Kalphung thar sawrkar hian, repair ngai lova kum nga tal daih thei tur kawng thar tha leh tlo hi a sual chhuak dawn em tih chu mipui thlir ber tur pakhat a ni leh ta a ni.