Mahni kutkea din tum Bana Kaih turte inel zo

Mahni kutkea din tum Bana Kaih turte inel zo
Sawrkarin mahni kea din tumte tana bana kaih dan tur a buatsaih – Chief Minister’s Bana Kaih Innovation Challege lawmman chu Zirtawpni khan a hming putu chief minister hoin Aizawlah sem a ni.
Bana Kaih Innovation Challenge component palia intihsiakna thianghlim leh hlawhtling taka neih hnuah lawmman sem theih a ni chu a buatsaihtu Planning & Programmme Implementation Department chungah a lawm tih chief minister Lalduhoma hian a sawi.
“Kan thupui leh auhla ber chu, kuthnathawktu leh mahni kutkea ding duh, mi tumruh leh taima, an bana kai a, eizawnna ngelnghet an neih theihnana puih a ni a. Bana Kaih hnuaiah hian chutiang mite chu progress partner kan ti a, a thawhkhatna (pilot project) ah mi 517 thlan an ni. CM Special Package-ah mi pakhatin cheng nuai khat thleng an dawn theihna tura hma lak mek a ni bawk,” a ti.
Khawtlang, NGO leh registered societies pawhin Bana Kaih Programme hi a zar zo ve se an duh a. College zirlaiten intihsiakna thianghlim nei se an ti a. Chuvanga he Innovation Challenge hi siam an ni tih a sawi a ni.
Departmental Innovation Challenge-ah Sawrkar department hrang hrangin project pakhat theuh neiin an intihsiak a. Department 20 telin, a titha department 5 thlan chhuah an ni. 1-na Horticulture, 2-na Commerce & Industries leh Health & Family Welfare, 3-na Irrigation & Water Resources leh Directorate of Science & Department Technology.
District Innovation Challenge-ah an DC theuh kaihhruaiin an inel a. Intihsiakah hian NGOs, LC/VC, self help group, primary agricultural credit societies leh society anga inziaklut zawng zawng an tel. District 9 an tel a, district tinin an top 3 an thlang chhuak a ni.
Higher Educational Institutes Local Immersion Challenge-aj Mizoram sawkar hnuaia college, sawrkar laipui hnuaia college leh private college an tel a. Khaw hrang hrangah zirlaite kalin an riak a, an khaw kalnaten harsatna an tawh zirchiangin, a chhawk zangkhai theih dan dapin an intihsiak a ni. College 26 an tel a, 1-na Govt. Hrangbana College, 1-na Mizoram Christian College, 3-na Pachhunga University College an ni. College tel zawng zawng hi an khaw tlawhte tanpuina tur hlan nghal an ni.
Inventor’s Challenge a awm leh a. Ngaihtuahna thar seng a, thil tha leh tangkai duang chhuakte tan inelna buatsaih a ni. Thil thar /tih dan thar (innovation) chi hrang hrang pho chhuakin, a titha zualte chu seed funding pek an ni a, an khawl siam chhuahna atana tur a ni.