Mahni lu chunga meiling chhek…

lawng lui leh a fintu luia bawlhhlawh paih titawp tura hma la turin Centre for Environment & Social Justice chuan thuneitute an phut a, hma an la lo a nih chuan National Green Tribunal hnenah thlen an tum thu an sawi bawk a.
Hei hi Aizawl district bawrhsap chuan ngai pawimawhin thupek a chhuah nghal a: Aizawl district huam chhungah heng – leivung, lung nawi (stone dust), plastic atanga thilsiam leh bawlhhlawh chi hrang hrang Tlawng luia luanglut turin mi tu mahin an paihin an thehthang tur a ni lo. Thupek zawm lo chu Section 223 BNS 2023 hmangin an chungah hremna lek a ni dawn… tiin.
He thupek hi tihchhuah atanga thla hnih chhung huam tur a ni. District hrang hrangte pawh hian hetiang thupek hi chhuah vek se, thla hnih a ral hnuah thupek ngai, a tharin chhunzawm zat zel se, thupekin zawm a hlawh em tih hi taima takin vil zui zel ni bawk se, chutianga hma lak a nih phawt chuan, kar lovah kan environment hi a thianghlim thuaiin a rinawm. Mahse, thupek kan bawhzui that loh avanga tun dinhmun hi thleng kan nihna chen a awm avangin, khauh taka dan kenkawh hi district tin hian intihhmuh teh se!
Mizo thufing pakhat ‘Mahni lu chunga meiling chhek khawl ang’ tih hi a awm a; a awmzia kan hre vek awm e. Lu chungah hian meiling chhek khawl ta ila, kan chhek khawlna chu thirphek a nih pawhin meiling chuan thirphek chu a ur sa ang a, a tawpah thir phek chu a lo ling ang a, lu chunga a awm reng na na na chuan sam a tikang ang a, lu vun a kang zui ang a, kan tawpna tur chu a lo lang mai. Meiling chhek khawlna chu thing phek a nih phei chuan, meiling chuan thing chu a mut kang vat ang a, chutiang zelin. A tawpah kan tlu ang a, leiah kan zal tawh mai dawn a ni!
Mipui nunphung te, sawrkar kalphung leh inrelbawlna te hi han thlir vang vang hian, Mizo thufing ‘mahni chunga meiling chhek khawl ang’ tih hi a thleng dik mek ni berin a ngaih theih awm e.
Pathianin mihring a siam hma hian mihring mamawh tur pawimawh tak tak a siam hmasa tih Bible-ah kan hmu a; chungte chu a hlawmin ‘Environment’ tia sawi a ni. Siamtuin kan mamawh tur a lo siam hmasakte hi mihringte hian a hlutna ngaihtuah thui duh lovin, nawmsak kan tum luatah ‘environment’ tichhe zawng hlirin kan khawsa ngar ngar a. A bikin Mizote hi, ‘a tawpa tawrhna nasa tak kan chunga a lo thlen phawt hmaa harhchhuah nachang hre lo’ kan ni awm e. Kan han harh chhuah meuh hi chuan a lo tlai lutuk tawh ziah lehnghal; chu chu tuna kan dinhmun mek hian a hril zel a nih hi! Kawngpui chungchangte pawh hi han bel chiang ta ila… vision kan neih thui loh ang bawkin kan kawngpuite pawh hi a tha rei ngai lo a. A bul (foundation) a dik tawh loh avangin a chung lam a dik thei tawh lo va, ngaihthahna (meiling chhek) avangin tun hi kan thleng chu a ni ber tawh e!
Chuvangin, mahni lu chungah em hi chuan meiling hi i hlang chho tawh lo teh ang u khai… i harh teh ang u!