Mahnia eizawnna bul tan tirte tan hriat tur tul inhrilh

Startup India leh Mizoram Startup Mission tangdun buatsaih ‘Accelerating Startup Callibre & Entrepreneurial Drive’ (ASCEND) Financial Literacy Bootcamp, Mizoram Edition chu Zirtawpni khan Aizawlah neih a ni.
Hmanpuitu Commerce & Industries minister F. Rodingliana chuan Mizoram tana pawimawh tak entrepreneurship chungchanga hriat tul inzirtirna buatsaih a ni chu lawmawm a tih thu a sawi a. Start-up a nih angin ropui taka bul tan a kawk lo a, hniam taka bul tan a, rei tak ding thei tura ngaihtuahna seng a tul tih a sawi a ni. Entrepreneurship lamah Mizoram chu bul tan tir leh hma la chho ve mek a ni, tiin, sawrkarin ‘Bana Kaih Policy’ hmangin sawrkar laipui scheme ho nen tangkawpin kalpui tum a ni tih a sawi bawk.
Account vawn leh enkawl dan, mahni kutkawih sumdawnna kaltlanga hlawkna tel thei tura zinkawng zawh ngai leh pawimawh bakah thu pawimawh hrang hrang mithiam sawmbik ten an sawifiah a, zawhnate chhan a ni.
Entrepreneurship Development Scheme chak zawka kalpui turin Planning & Porgramme Implementation department hnuaiah kum 2017 khan Entrepreneurship Development Centre (EDC) din a ni a; 2022 August 30 khan Mizoram Startup Mission tia thlak a ni. Hemi kaltlang hian entrepreneurship tihhmasawn leh chawisan kawngah theihtawp chhuah a ni. Kum 2017-a EDC din a nih hnuah DPIIT recognised startup 22 neih a ni tawh a, women entrepreneur 35 eizawnna ngelnghet nei thei tura chherchhuah an nih tawh bakah hmalakna hrang hrang kaltlangin mi 5000 chuangin eizawnna an nei tawh. IT service, food processing unit, health service, textile, handloom & handicraft-te chu hmalakna sector langsar zual a ni.