Mahua Moitra in bana nihna SC ah khing let nghal

Trinamool Congress leader Mahua Moitra chuan Thawhtanni khan Supreme Court-ah kar kaltaa ‘cash for query’ corruption case avanga Lok Sabha atanga hnawhchhuah a nihna chu a khing.
Kum 49-a upa Moitra hi pawisa fai cheng vaibelchhe hnih bakah ‘luxury gift items’ te businessman Darshan Hiranandani hnen atangin Parliament-ah sorkar sawiselna lam zawhna pawimawh zawhsak avangin a dawng tih a ni a. Hei bakah hian Moitra chu Hiranandani an chung zawhna chu a zawh theih nan parliamnetary website-a a confidential account log-in credentials peah puh a ni bawk.
Modi sorkar sawiseltu langsar Moitra chuan thamna laa puh a nihna tin te chu hnawl vekin hei bakah hian log-in details erawh midangte a hrilh thu a sawi a. Heng log-in details te hi chu MP dangte pawhin an tih thin dan a ni, a ti.
Ethics Committee report chuan Mahua Moitra chungchangah dan kalha lawmman a dawn chu phat theih a ni lo a ti a, hei bakah hian sumdawngte hnen atanga log-in details pek dan kalh a ni, a ti bawk a. A chet dan chu MP tihawma mawi lo leh unethical conduct tiin an sawi bawk.
Ethics Committee report phek 500 vel lai avang hian Lok Sabha-ah opposition leh ruling BJP te inbeihna nasa tak a thleng a, chu mai bakah mahni insawifiah tura Moitra thusawi pawh phalsak a ni lo.
Sawihona nasa tak neih a nih hnuah voice vote lak niin Lok Sabha Speaker Om Birla chuan “He House hian Committee thutlukna pawmin MP Mahua Moitra chet dan chu sual leh mawi lo a ti a. Chuvangin MP a nih zui zel a rem lo,” tiin a sawi.
Lok Sabha chhunga thusawi khapsak a nih hnuah Moitra chuan Parliament pawnah ethics panel te chu sawiselin ‘dan chi tin an bawhchhia’ tia sawiin nakinah CBI ten min dap zui ang, a ti bawk.
Mahua Moitra hi CBI ten an chhui chian mek a ni sa bawk.