Mainz muala mualpho Bayern!

Mainz muala mualpho Bayern!
Bundesliga hmahruaitu Bayern Munich chu head coach thar Vincent Kompany hnuaia a vawikhatna atan league-ah an tlawm ve ta nge nge a, Inrinni khan Mainz 05 khelmualah 2-1-in an chak lo!
Bayern hi sihnih faia an hnufual hnu hun pangngai tawp hma minute thum chiah awm tawhah Leroy Sane chuan chiang zawka an tlawm tur chhanin goal khat a khung a, England striker Harry Kane tela player pawimawh inhliam kawl teuh Bavarians an damkhawchhuak zo ngang lo a ni ber!
He inkhel goal hmahruai hi chawlhlawk hma minute thum la awma South Korea forward Lee Jae-sung thun niin, Asian player bawk hian second half minute 60-ah a goal hnihna leh Mainz chakna goal ni zui ta a thawh leh a, Belgian boss-in Real manager a nih hnua league-a a tlawm vawikhatna a tawngbaw ve ta nge nge a ni.
Inkhelh banah Kompany chuan, “Tumruhna leh thathona sang tak nena inlan team tha kan hmawchhawn a, kha game-ah khan kan tumpuite khan an fight tluanchhuak parh a ni ber e.
“Keini lamin kan fight tawk lo a, kan theihna sang berin kan khel chhuak zo lo a, kan that ber hun kan thleng zo lo.
“He game-ah hian kan theih chin a tawp tlat a, karleh lam atan thing tuah tur kan lakkhawmna tal ni teh se,” a ti.
Inkhel dangah defending champion Bayer Leverkusen chuan sihnih faia mualneitu Augsburg hneh chungin Bayern nena an inkar chu point liah an dah a; an chakna goal hnih hi Martin Terrier leh Manchester City target Florian Wirtz-te tihluh a ni.
Leverkusen hian khelh 14-a point 29 hum chungin table-ah pahnihna an luah chhunzawm a; hmahruaitu Real Madrid chuan match 14-ah point 33 neiin Leverkusen laka an san zawkna a derthawng leh hlek a ni.
Inrinni inkhel danga Union Berlin leh an mikhual Bochum sikhat ve ve thuna an inhnehtawk tumin mikhual Bochum goalkeeper Patrick Drewes chu mipui lam atangin a luah an rawn vawm a, hei vang hian inkhel kal tluang lai chu darkar chanve dawn lai tihtawp lailawk a ni.
Kum 31 mi German hi second half hun pekbelh minute hnihna a kal mek laiin a hnung lama mipui zing atangin cigarette lighter-in an rawn vawm a, he tih lai hi 1-1 a nih lai ni tawhin, Drewes hi a lu dawm vawng vawng chungin khelmual chhuatah a thingthi a, damdawi thiamte’n an bawisawm hnuah referee Martin Petersen chuan inkhel a titawp lailawk a, player-te pawh inthlakna pindan lama lo insaseng rih turin a hriattir bawk.
Inkhel chhunzawm leh a nih hnuah pawh goal dang a luhbelh zo ta lo a; table mawngphah Bochum hian league game 14 an khelh tawhah chak an la nei lo a, draw vawithum hmanga an point thum hlawhchhuah ve tawh nen an hmabak a thim chhah zel!
Point 17 hum chungin Union Berlin chuan table-ah 12-na an luah thung.