Maite-ah thing kuitiahna siam

Maite-ah thing kuitiahna siam
Tawi bialtu MLA, minister chuan a bial chhung khaw hrang hrang a tlawh a. Maite khuaa Community Nursery siam chu a hmunah a enfiah.
Nursery chu ram tana rotling leh nakin thlenga ram leilungfate tana chhenfakawm thil a ni tih bialtu MLA hian sawiin, hma latu RD department thawhrimna leh inpekna lawmawm a tih thu a sawi. Kum tin ram vah chereu a, a dah belh lam a tlem si chuan kum reiloteah mihringin kan tuar mai dawn tih a sawi a. Mipui chu theih ang tawka RD department hmalakna thlawp turin a chah.
He project hi RD department hnuaiah kum thum chhung atan plan siam niin, a tum ber chu rambua phun khah lehna ni a; MGNREGA hnuaiah mipuiin ramngaw siam a nih leh theihnan hmalakna pawimawh leh lian tak a ni. Project cost hi cheng nuai 80 a ni a, kumin hi a kum hnihna niin, nursery-ah hian thing chi (variety) hrang hrang 28 kuitiaha enkawl mek a ni a, thing tiak hi 50000 vel neih tawh a ni.
Nursery-a thing kui tiah hi thing zai chi (commercial tree), damdawi (medicinal) atana hman chi leh avenue/ornamental tree an ni a. Thlai tiak ho hi engemawzat chu kumin chhunga sem chhuan hman tum niin, ni pawimawh bik leh Green Mizoram Day leh convergence hna atan bakah sikulin a thlawna phun tura sem chhuah a ni ang.
MLA hian a bial chhunga hmasawnna hrang hrang thawh mek hna a that leh that loh a en a, hnathawh mek chu ZPM sawrkar a nih ang ngeiin tha leh tlo tak, mipui mit tlung ngeia thawk turin a chah.