Mak leh ropui taka champion Alcaraz

Pathianni zan khan French Open 2025, mipa final khelh a ni a. French Open final rei berah Champion lai Carlos Alcaraz chuan mak leh ropui takin Jannik Sinner a lehthal a, a champion nawn leh.
Final a intum World No. 1 Jannik Sinner leh No. 2 Carlos Alcaraz te hi inelna neih meka chetha fal an ni a. Inel tawk em em an nih bakah Grand Slam final a la tlawm ngai lo ve ve an ni bawk a, an inhmachhawn hian ngaihven a hlawh hle. Ngaihven hlawh leh mi en chak ang ngeiin inkhel a hmuhnawm a, a rei tel bawk nen beisei lawk ang ngeia inkhel hmuhnawm, en manhla a ni.
US Open leh Australian Open a champion zawn mek Jannik Sinner an champion lai Alcaraz lakah bul a tan tha a, a vuak na tak leh a service dik tak a chhawr tangkai. Set khatnaah break pawimawh tak a neih chhawr tangkaiin set la hmasa zawkah a tang.
Harsa taka set khatna a lak hnuin set hnihnaah Sinner a khel tha zui viau a, Alcaraz serve a break nghal. Sinner hian 5-3 a hmahruaiin awlsam taka set lak belh theihna hun remchang a nei. Sinner a chetha a, dinhmun chhe taka a ding hi Alcaraz huaizia leh a danglam bikzia lantirtu a ni. Alcaraz hian a khingpui a break a, a umphak chho ta hial. Set hnihna tie-break ah Sinner a chungnung ta tho thung. Set hnih a lak zawn vangin Sinner hian champion a hnaih hman hle.
Set hnih a hloh zawn hnuin set thumnaah Alcaraz tak tak kan hmu a, game li hloh chungin set a la a, Sinner nen an inkar a tizim. Set linaah Sinner an champion theihna hun tha zet mai a nei. Sinner hian 5-3 In hma a hruai a, Alxaraz serve laiin 0-40 ngawtin hma a hruai bawk. Vawi khat lek tih dika champion thei a nih laiin a chesual a, vawi nga ngawt a tihsual zawn vangin a champion theihna hun tha hmasa a hloh phawt. Pui taka match point save a, a him vangin Alcaraz a phur a, amah tantute an au ring viau bawk. A khingpui break zo lo mah se a serve a hum a nih chuan Sinner hi a champion tho dawn a, a dinhmun a la tha hle. Champion mai thei dinhmuna a din laiin a chiai a, talbuai tlatin a serve a hum zo lo. Tie-break ah point thum aia tam hmu zui thei lovin set a hloh zui leh ta daih zawk.
Mak tak maia a dam khawhchhuah hnuin Alcaraz a khel tha zui a, deciding set bul tannaah Sinner a break nghal pang. Alcaraz hian a serve hum chho zelin 5-4 in hma a hruai a, a serve a hum leh a nih chuan a champion dawn. Champion theihna hun tha a neihah Alcaraz hian a serve a hum zo lo ve leh teh tlat a, tie-break khelh zui a ngaih phah. Tie-break erawh Alcaraz chan a ni chiang ta viau thung a, 10-2 ngawtin a chungnung a, French Open final rei berah 4-6, 6-7 (7-5), 6-4, 7-6 (7-3) leh 7-6 (10-2) a chakin a champion zui ta a ni.
Kum 22 mi lek ni chunga Grand Slam panga la tling tawh Carlis Alcaraz hi, “Roger Federer anga thiamna ril nei. Rafael Nadal ang maia thahrui nghah, Novak Djokovic anga huaisen leh paukhauh”, tiin an sawi thin. Hetianga a chanchin sawitute hian an sawi uar lem lo tih French Open final ah fiah taka hmuh tur a awm. Dinhmun chhe taka a din laiin a zam mai lo, a buai lova, a chiai mai hek lo. A huai a, a dawh theih a, a fim em em reng bawk. Jannik Sinner a hneh theih chhan lian leh pawimawh tak chu huai zawk a ni kha a ni. Hliamin a tibuai a nih loh chuan ‘Alcaraz nge nge’ kan la tih fo a rinawm.
Sinner leh Alcaraz inkar a zau hret
French Open khelh zawh hnuin Thawhtanni khan ranking thar tihchhuah thar a ni a, No. 1 ni mek Jannik Sinner leh Carlos Alcaraz te inkar point 500 in a zau belh.
French Open 2024 khan Jannik Sinner hian semi-final a lut a, ranking ah point 800 a hmu. Kum 2025 ah final a lut a, ranking poi nt 500 a hmuh belh. Hetihlai hian 2024 champio Carlos Alcaraz a champion nawn leh a. Ranking point 2000 a neih sa a humhim chiah chiah a, hloh leh hlep nei lovin, ngai a awh ve thung. Final ah khan chak lo ta se chuan Ranking point a neih mek atangin point 700 lai paih a ngai dawn thung.
Ranking chhuak tharah point 10880 hmuin a chung berah Sinner a awm chhunzawm a. Alcaraz-an point 8850 hmuin pahnihna luah a. Novak Djokovic chu No. 6 atangin No. 4 ah a kai sang ve bawk.