Mala remchan leh loh vangin Vana leh vai inhnek dawn

Hun tepterah R. Malsawmtluanga a remchan leh loh avangin chawpchilh takin HC Johnkenty Vanhlimpuia inhnekpui tur thlak a ni a, Bosch Home Appliances LPS Fight Night-ah Pushpak Verma hmachhawnin professional a luhchilh dawn.
2019 LPS Pro Fight lightheavyweight champion a nih hnua a vawikhatna’n Tuipui chhuanvawr Vana’n Mizoramah inhnek leh a tum a; July ni 26, tunkar Zirtawpni zan hian LPS Arena, Falkland-ah Indian Army Sports Insitute, Pune-a awm mek Mala nen amatuer huangah round li inhnek tura puanzar tawh a ni.
A tirah engkim kal tluang thei vek turin Mala’n sawi mah se kar hmasa Zirtawpni khan harsatna a tawk tih a sawi a, an hotute’n inhnek tura Mizorama haw phalna an pek mai theih loh avangin dilsak turin Fight Night buatsaihtute a ngen.
Organising Committee chuan Indian Army Sports Insitute enkawltu Commandant Col. Devraj Gill biain thil awmzia an sawipui bakah, e-mail hmangin lehkha an thawn a, inthlahrung tak chungin Gill hian ‘tunah chuan a remchang lo a’ hun dangah erawh harsatna a awm lo ang, tiin a chhang.
Organising Committee chuan Mizo mipui hmuh chak inhnek chhawpchhuah ngei a duh a, Indian Navy boxer Vana’n professional boxing luhchilh a duh bawk avangin chawplehchilh takin hma a la a, ni thum a la awm tihin thutlukna thar a siam phah.
Thawhlehniah Rajasthan boxer Verma nen light heavy huangah round li inhnek tura tihfel an ni a; kum thum kal taa a lo tum tawh professional luhchilhna hun tha a neih theih dawn avangin Vana a lawm hle a ni.
Kum 28 mi Verma hian professional boxing vawithum khel tawhin a chak vek a, knockout hmangin mi pahnih a hneh. December ni 17, 2023 kha a inhnek hnuhnun ber niin, Kolkata-ah technical knockout hmangin Jayesh Jayprakash Pandey a tuktlawm.
Vawinga Pro Fight champion ni tawh leh tum thum Inter-Services champion ni tawh, kum 27 mi Vana chuan Mala nena inhnek ngei duh mah se professional a luhchilh thei tur chu a duhthusam zawk a nih thu a sawi a, a hma lam hun hril thei tur zawk a nihzia a sawilang tel.
LPS Fight Night vawilinaah inhnek vawiruk a awm dawn a, a hnuhnung berah Vana leh Verma an innuai ang.
Bantam-ah Laldinsanga leh Ramdinthara intawng nawnin round ruk inhnek tura tih an ni a, a tirah professional boxing tum thum awm tura tih tawh chu pali a awm dawn ta a ni.
A hmuna en duh tan ticket Rs. 100 man bakah Rs. 200 man 52 siam a ni a; Ningani zing dar 8-ah inhnek tur boxer-te LPS Office, Zarkawtah inbukin, Ningani zan dar 8-ah LPS Auditorium-ah phochhuah zui an ni dawn a, LPS 1-ah live-a pekchhuah a ni ang.