Malaria Do hi

Malaria do beihpui thlak a ni deuh reng chungin ‘do rem’ tak tak erawh a lo harsa a ni ang, a changin malaria thihpui tlem tum a awm a, a changin malaria thihpui tam tum a awm leh a. Kum 2005 chho atang khan kum khatah mi 30-40 velin an thihpui thin a, a hnu lamah a ziaawm chho hret hret a. Kum 2015 atangin a tlahniam a, kum 2019 atangin a rawn sang chho leh a.
Kum 2021 khan malaria vei 5,637 awmin thihpui 10 an awm a. Kum 2022-ah malaria vei 10,229 awmin mi 10-in an thihpui leh a. Nikum khan Mizoram chu ram chhungah malaria case ngah pasarihna a tling a, northeast-ah a ber kan hauh a. Kuminah chuan India ram pumah a ber kan hauh leh ta.
Kumin Jan-April thla chhungin malaria vei 1,734 awmin thihpui an awm lo a. Kumin quarter hmasa bera malaria vei tam lam atanga chhut chuan vanneihthlak takin kumin hi kum dang aia ziaawm theihna chance a lian hle niin a lang.
Malaria lam buaipuituten Mizorama malaria vei tam zualna hmun district pali Lunglei, Lawngtlai, Mamit leh Siaha-ah te Mizorama case zawng zawng 80% a awm thu leh heng hmunah te hian nasa lehzuala hmalakna kalpui a nih tur thu an sawi tawh a. Malaria Do beihpui thlakna a rei tawh ngaihtuahin, Mizoramin hma a sawn dan hi a duhawm lo hle a. A changa hniam, a changa sang leh phut thin hian hmalakna nghet chet chawt a awm tha tawk lo em ni ang tih a ngaihtuah theih rum rum awm e. Mipui zirtirna pawh hi, a thua kan infah hi a takin zawm a ni em tih hi malaria hluar zualna district-ah te chuan survey neih theih ni nghe nghe se chuan kan tangkaipui hlein a rinawm.
A chhe zawnga a sang lam kan hauhna hi a tam ta hle a, Malaria do pawh hi a peak season a lo thlen chauha ri hluai bik chuang lo va, kum tir atanga kumtluana tanlak mar pat theih a nih phawt chuan a changa hniam, a changa sang thut thut ang hi a pumpelh theih ang a, mar patin a tlahniam hret hret thei ngeiin a rinawm a ni.