Mizoram chu a mi cheng zat azira chhutin sikserh (malaria) vei hmuhchhuah tamna ber state a ni a. An hmuh tamna lai hi Bangladesh ramri bulhnai, khaw tlawhpawh harsa leh hmun nghet nei lote an ni ber. Hetih lai hian kuminah Mizoramah Dengue vei mi 220 hmuh an ni tawh a, thihpui an la awm lo.MALARIA:
National Health Mission hnuaia State Vector Borne Disease Control Programe (SVBDCP) thawktute sawi danin, kum 2022 chhung khan Mizoramah malaria vei leh vei loh endik tamna ber chu Mizoram a ni a, annual blood examination rate (ABER) ah India ramah sang berin zaah 25.69 a ni a, a dawttu Tripura chu zaah 20.84 a ni. Chattisgarh (18.66), Odisha (17.17) leh West Bengal (11.76) ten an dawt a ni.
Heng state panga hi ram pumah an state population atanga chhutin mi 1000 zela vei hmuhchhuah zat (annual parasite incidence- API) ah a sang zual an ni a, Mizoramah malaria vei hmuhchhuah chu thisen endik atang hian zaah 8.16 niin, Tripura 3.05 a ni a, state dang pathum hi 1% tling pha lo vek an ni. Malaria thihpuiah Mizoram aiin Chhatisgarh hi pakhatin a tam a, nikum chhung khan mi 11-in an thihpui. Mizoramah mi 10-in an thihpui thung. State dang pathum hi chu 5 leh hnuailam an ni. Kuminah April thlenga chhinchhiahah Mizoramah thihpui an la awm lo thung.
Malaria vei hmuhchhuah tamna hi India huap ang pawhin tribal ho chen tamna a ni deuh zel a, Mizoramah chuan ramri, a bikin Bangladesh nena inrina bulhnaiah hmuhchhuah a tam a, heng mi tam zawk hi kawngpui tha in a tlawhpawh mang loh, a then phei chu lawnga luh ngai; a then leh chu pem kual, awmhmun nghet tak nei lo an ni a. Raltlan zingah pawh hmuhchhuah a awm nual tih SVBDCP hotute chuan an sawi.
Malaria vei zingah an taksaa langchhuak mai lo (asymptomatic) an awm a, heng mite hi malaria hrik pai thosi in a sehin, midangah an kai chhawn leh mai thei tih an sawi. Malaria damdawi chu a hranpaa awm a nih avangin dam hlen turin ei zawh ngei a ngai a, kan taksaa malaria hrik a inkhuar tawh laklawh chuan taksa bung hrang hrang tihchhiat leh khawih buai theih a ngah tih an sawi a ni.
June thla hi Mizoram pumah Malaria do thla – Anti Malaria Month a puan a ni a. Mizoram district tinah malaria do beihpui hi thlak a ni dawn tih SVBDCP state programme officer Dr Chawngthanchhunga chuan a sawi a. Hmasawnna in malaria hi engemawchen a umbo thei tih chu an hmuh dan a nih avangin heng malaria tamna hmunah hian sawrkar pawhin mipui tihhmasawnna tur lam duang se, malaria chu a ziaawm thei mai tura ngaih a ni tih a sawi.
-- Advertisement --
DENGUE:
Thosi zingah malaria hrik pai chi ang lo takin, Dengue hrik pai chi hi ‘thosi tial’, a te chi leh harh tak, thlawk reng mai chi a ni a, mi pakhat a sehin a duhtawk mai lo a, a seh hmasak ber bulhnai ami midang a seh kual a, chu chuan he hri hi a tidarh chak phah ta thin, tiin SVBDCP chuan an sawi.
Dengue hi chi (stereotypes) 4 awmin, tuna Mizorama Dengue rawn lut hi eng chi ber nge tih finfiah ala ni loa, inenkawl dam angin inngai mah ila, a chi dang pai thosi in min sehin, a hma aiin taksa tan a hlauhawm sauh zawk, tih an sawi a. Dengue hi a tihdamna damdawi la hmuh chhuah loh a nih bakah malaria-a sawrkarin a thlawna tih sak theih a ngah ang kha, tih sak theih a awm ve meuh lo tih an sawi bawk.
Mizorama dengue a rawn luh ve hnu, a bikin nikum lamah dengue hluarna hmuna hriatah damdawi kah (fogging) ti turin sawrkar hotu – minister, MLA, corporator adt. atangin anmahni bial ang chi ah te nawrtu an tam hle tih an sawi a. Dengue reh na tur erawh chuan fogging hi a bul ber a ni loa, heng thosi pian theihna, tui fim leh nu pawh, mahni huam chhungah thenfai (source reduction) tih a nih loh chuan a sawt lo hle tih an hmuhchhuah thu an sawi.
Hei vang hian kuminah chuan eng ‘pressure’ pawh hotu lam atangin rawn awm leh mah se, a veng/khua/ thler ten thosi pianna tih tlem tum hma an la hmasa a nih loh chuan fogging tih hi an tum tawh lo tih SVBDCP hian an sawi. “Nikumah hmun pakhatah thla 6 chhung kan kap (fog) a, source reduction lam an tum si loh avangin a sawt lo lutuk a, kan sim tawh” Dr Chawngthanchhunga chuan a ti. Fogging hian a thosi a chauh a tihlum thei a, a note a tihlum tel thei loa, an rawn len hunah a hluar leh mai thin tih a sawi a ni.
Malaria
n Kum 2022 chhung khan Mizoramah malaria vei leh vei loh endikin thisen 322191 endik a ni a, malaria vei hmuhchhuah 10229 an ni. Heng zinga 2742 hi Pv an ni a, Pf 7487 niin, mi 10-in an thihpui.
n Malaria vei 10229 hmuhchhuahah hian Lawngtlai district-ah 4775, Lunglei district 2888, Mamit district 1474 leh Siaha district 933 chu hmuhchhuah tamna zual a ni a. Aizawl East (20), Kolasib (22) leh Serchhip (28) chu hmuh tlem na a ni.
n Kum 2023 ah April thleng khan malaria hmuh tamna hi nikuma hmuh tamna te tho an ni a. Lawngtlai 879, Lunglei 460, Siaha 211, Mamit 166 a ni. A dangah chuan 5 leh a aia hniam vek a ni. A vaiin malaria vei 1734
Dengue
n Nikum chhung khan Mizoramah dengue vei 1868 hmuhchhuah an ni a, mi 5-in an thihpui.
n Nikum hian fur intan hnu, June atangin a hluar tan a, hmuh tam ber thla chu November niin, test 1227 tihah a vei 611 an hmu. Nikuma dengue thihpui zinga pathum chu November-a thi an ni nghe nghe.
n Kuminah June 11 thleng khan dengue vei leh vei loh endik 2897 atangin a vei 220 hmuhchhuah an ni a, April-ah an tlem deuh tih loh chu, nikum nena khaikhinin dengue vei hmuhchhuah hi January – June inkarah hian a tlahniam viau tawh lo a ni. Kuminah erawh thihpui an la awm lo.